Yuri Kim: Angazhim për të forcuar miqësinë
Meta: Së bashku të përballojmë me sukses sfidat që ka vendi
Ambasadorja e re e SHBA- së në vendin tone dorëzoi dje letrat kredenciale te Presidenti Meta, duke nisur kështu zyrtarisht punën në Shqipëri. Gjatë ceremonisë zyrtare në Presidencë, Kim dhe Meta folën për forcimin e mëtejshëm të marrëdhënieve mes dy vendeve. Kreu i shtetit, Meta, në një postim në rrjetet sociale e cilëson këtë takim si shumë të frytshëm dhe se i shprehu gatishmërinë diplomates amerikane për t'i forcuar akoma dhe më tej raportet mes dy popujve dhe vendeve. "I kënaqur të prisja dhe të pranoja letrat kredenciale të ambasadores së re të SHBA- së, znj. Yuri Kim. SHBA një partner strategjik, i pazëvendësueshëm për Shqipërinë. Së bashku të përballojmë me sukses sfidat që ka vendi. Zoti e bekoftë miqësinë shqiptaro- amerikane!", shkroi Presidenti Meta në rrjetet sociale. Ndërsa ambasada e SHBA- së në Tiranë shkruan se gjatë takimit, Presidenti dhe ambasadorja e re Yuri Kim folën për mënyrat e forcimit të marrëdhënies mes dy vendeve. Në postimin e ambasadës në rrjetet sociale thuhet se Kim dhe Meta përsëritën angazhimin për ta forcuar akoma dhe më shumë miqësinë mes Shteteve të Bashkuara të Amerikës dhe Shqipërisë. "Ambasadorja e re e Shteteve të Bashkuara të Amerikës në Shqipëri, Yuri Kim, i prezantoi letrat kredenciale Presidentit Ilir Meta sot në mëngjes. Pas ceremonisë, ambasadorja Kim dhe Presidenti Meta biseduan mbi miqësinë e gjatë midis Shteteve të Bashkuara dhe Shqipërisë, si dhe përsëritën angazhimin e përbashkët për të vijuar përparimin e saj duke u mbështetur në forcën e marrëdhënies sonë", shkruhet në reagimin e ambasadës. Yuri Kim është ambasadorja e 10- të e SHBA- së në Shqipëri, pas rivendosjes së marrëdhënieve diplomatike në vitin 1991. Bashkë me 5 diplomatët amerikanë që kanë shërbyer para Luftës së Dytë Botërore, Kim e çon në 15 numrin e ambasadorëve që kanë drejtuar selinë diplomatike që ndodhet në Rrugën e Elbasanit. Pas Marisa R. Lino dhe Marcie B. Ries, Yuri Kim do të jetë gruaja e tretë që do drejtojë ambasadën amerikane në Shqipëri. Në fjalën që mbajti në Kongres para se të merrte zyrtarisht misionin diplomatik në Shqipëri, Kim premtoi se do të vijonte të mbështeste zhvillimin e demokracisë në Shqipëri dhe rritjen e shkëmbimeve tregtare mes dy vendeve.