Integrimi, Samiti i PE: Mbështetje për Ballkanin
“Në Zagreb të rikthehet besueshmëria e politikës së zgjerimit”
Parlamenti Europian dhe drejtuesit e parlamenteve të Ballkanit Perëndimor i bënë thirrje Këshillit Europian që të vazhdojë të mbështesë perspektivën europiane të Ballkanit Perëndimor.
Përmes një deklarate të përbashkët, krerët e parlamenteve të Ballkanit Perëndimor të mbledhur në Bruksel në samitin e organizuar nga kreu i Parlamentit Europian, Sassoli, kërkojnë nga samiti i Zagrebit dhënien e një mesazhi pozitiv për politikat e zgjerimit të BE- së. Në fund të takimit, samiti doli me një deklaratë të përbashkët që u firmos nga kryetarët e parlamenteve të 6 vendeve të Ballkanit Perëndimor, Shqipërisë, Kosovës, Serbisë, Maqedonisë së Veriut, Malit të Zi dhe Bosnjë- Hercegovinës. “Ne, Kryetarët e parlamenteve të Ballkanit Perëndimor, bashkë me Presidentin e Parlamentit Europian dhe Kryetarin e Parlamentit të Kroacisë, i cili përfaqëson Presidencën kroate të Këshillit të BE- së, rikonfirmojmë rolin kyç të parlamenteve për çuarjen përpara të axhendës së reformave të BE- së dhe për ruajtjen e aspiratës europiane të popujve të Ballkanit Perëndimor; i bëjmë thirrje Këshillit Europian që të vazhdojë të mbështesë perspektivën europiane të Ballkanit Perëndimor, bazuar në plotësimin e kritereve të anëtarësimit, dhe të japë një mesazh politik të qartë dhe pozitiv në lidhje me hapjen e negociatave të anëtarësimit dhe dhënien e statusit të vendit kandidat”, thuhet në deklaratë.
ZAGREBI Ata kërkojnë që samiti i Zagrebit të kthejë besueshmërinë e politikave të zgjerimit. “Gjykojmë se samiti i Zagrebit mund të luajë një rol shumë të rëndësishëm për të kthyer kredibilitetin e politikës së zgjerimit dhe për t’i dhënë këtij procesi një shtysë të re efektive përmes konkluzioneve konkrete, që do ta çonin rajonin më pranë BE- së dhe do të garantonin qëndrueshmërinë e perspektivës europiane të Ballkanit Perëndimor; konfirmojmë angazhimin e plotë të parlamenteve tona për të marrë pjesë në reflektimet për një ‘ qasje të re’ ndaj zgjerimit, në mënyrë që procesi të bëhet më demokratik, më transparent dhe më pranë qytetarëve dhe shoqërisë civile; rikonfirmojmë se sundimi i ligjit është – dhe duhet të mbetet – një gur themeli i procesit të anëtarësimit; besojmë se fuqizimi i parlamenteve është një pjesë thelbësore e procesit të zgjerimit, pasi vetëm parlamentet e fuqizuara dhe efikase, me kultura të forta të dialogut gjithëpërfshirës dhe arritjes së konsensusit, mund të jenë motorë të vërtetë dhe efektivë të reformave”, thuhet në deklaratë.
PRESIDENTI Presidenti i Parlamentit Europian, David Sassoli, kërkoi një shtysë të re urgjente të procesit të zgjerimit të BEsë. Sassoli ishte organizatori i samitit të parë me drejtuesit e parlamenteve të Ballkanit Perëndimor. Atyre iu bashkua kryetari i Parlamentit të Kroacisë, i cili po mban Presidencën e radhës së Këshillit. Pas samitit, Presidenti Sassoli deklaroi se, “samiti riafirmoi bindjen tonë të fortë se Ballkani Perëndimor dhe Bashkimi Europian ndajnë një fat të përbashkët. Ne besojmë me vendosmëri se zgjerimi do të sjellë dobi për njerëzit e rajonit dhe vendet anëtare të BEsë dhe se mund të sjellë pajtim shumë të nevojshëm mes fqinjëve. Tani, ne duhet të sigurohemi që ky vullnet politik të përkthehet në veprim”. “Në deklaratën tonë të përbashkët, ne i bëjmë thirrje Këshillit Europian që të vazhdojë të mbështesë perspektivën europiane të Ballkanit Perëndimor bazuar në përmbushjen e kritereve të pranimit dhe të japë një mesazh politik të qartë për hapjen e negociatave të pranimit dhe dhënien e statusit të kandidatit. Urgjentisht, duhet të japim shtysë të re në procesin e zgjerimit, duke dhënë rezultate konkrete. Samiti i Zagrebit duhet të luajë një rol kryesor në këtë drejtim”, tha Sassoli. “Në përfundimet tona, ne ritheksojmë angazhimin e plotë të parlamenteve tona, për të marrë pjesë në reflektimet mbi një ‘ qasje të përtërirë’ për zgjerimin, në mënyrë që procesi të bëhet më demokratik, më transparent dhe më i afërt me qytetarët dhe shoqërinë civile. Zgjerimi është një proces që kërkon shumë përpjekje dhe angazhim nga të gjitha palët, dhe parlamentet janë kryesoret për të çuar përpara axhendën e reformës në BE. Parlamenti Europian është i gatshëm të vazhdojë dialogun konstruktiv dhe të mbështesë parlamentet e Ballkanit Perëndimor, ndërsa ato lëvizin drejt një të ardhmeje europiane”, theksoi Sassoli.