Kushtetuesja, Venecia merr në shqyrtim pyetjet e Presidentit

Komisioni i Venecias ka konfirmuar zyrtarisht se ka pranuar kërkesën e bërë pak kohë më parë nga Presidenti i Republikës, Ilir Meta. Kërkesa synon dhënien e një opinioni për veprimtarinë të Kuvendit të Shqipërisë dhe Kryetarit të KED- së, Ardian Dvorani, në procesin e emërimit të dy anëtareve të Gjykatës Kushtetuese, Elsa Toska dhe Fiona Papajorgji. Sipas materialit qe ka siguruar gazeta "Panorama", kërkesa e kreut të shtetit do të shqyrtohet bashkërisht me kërkesën e Kryetarit të Kuvendit, Gramoz Ruçi, në muajin mars. Pasi ka administruar pyetjet e Kuvendit, të cilat kërkojnë ta cilësojnë antikushtetuese dekretin e Kreut të Shtetit për anëtaren e Kushtetueses Marsida Xhaferllari, tashmë Venecia ka pranuar edhe kërkesën prej 64 faqesh të Presidentit Ilir Meta. Në pyetjet drejtuar këtij institucioni ndërkombëtar, Presidenti akuzon Parlamentin dhe kreun e KED- së, Ardian Dvoranin, se kanë shkelur Kushtetutën për emërimin e dy anëtareve të tjera të Kushtetueses Elsa Toska dhe Fiona Papajorgji. Pavarësisht argumenteve me shkrim nga dy institucionet shqiptare, një përfaqësi nga Venecia pritet të vizitojë Tiranën më 13- 14 shkurt, për të dëgjuar ballë për ballë të gjitha palët e përfshira në çështjen e ngritjes së Kushtetueses. Delegacioni, përveç Ilir Metës, kreut të Kuvendit dhe komisionit hetimor, do të dëgjojë edhe versionin e drejtuesit të KED, Ardian Dvorani. Pas kësaj vizite, do të ketë edhe një raport paraprak për vendin tonë, ndërkohë që më 20 mars do të mbahet edhe seanca plenare me dyer të mbyllura e Komisionit të Venecias. Në këtë seancë, përfaqësuesit e Presidencës dhe të Kuvendit do të arsyetojnë kërkesën e tyre përpara zyrtarëve të këtij Komisioni dhe në fund të këtij takimi do të ketë edhe një raport përfundimtar për t'i dhënë zgjidhje debatit institucional për Gjykatën Kushtetuese. Vlen të përmendet se në seancën me dyer të mbyllura të Komisionit të Venecias, Kuvendi nuk do të përballet vetëm me Presidentin për çështjen e rendit kronologjik të zgjedhjes së anëtarëve të Gjykatës Kushtetuese, por edhe me Këshillin e Europës, për paketën "Antishpifje". Në seancën e 20 marsit, Komisioni i Venecias ka 6 pika në rend dite, ku 3 prej tyre i përkasin vendit tonë. Në fillim pritet që të shqyrtohen pyetjet që Kuvendi i ka nisur Venecias për Metën, pastaj pyetjet që Presidenti ka nisur për Kuvendin dhe më pas do të shqyrtohet çështja e paketës "Antishpifje".