Paniku nga gripi vrasës, MSH konfirmon: Nuk ka asnjë rast
Kontrolle në aeroport, vetëm për pasagjerët që vijnë nga Kina
Rasti i një gruaje të ardhur nga Kina vetëm 10 ditë më parë dhe të shtruar në Spitalin Infektiv të QSUT- së shtoi frikën se Koronavirusi nga një rrezik i largët, ishte shndërruar në një kërcënim prezent.
Por Ministria e Shëndetësisë, ndërsa konfirmoi rastin, hodhi poshtë zërat se gruaja ishte e infektuar nga virusi vdekjeprurës. Në njoftimin zyrtar thuhet se gruaja është e shtruar, por nga analizat ka rezultuar se bëhej fjalë për një gjendje të zakonshme gripale. Ndonëse pretendohet për shtim të masave për të mos lejuar depërtimin e Koronavirusit, zyrtarisht mësohet se kontrollet janë kryer vetëm për pasagjerët që kanë udhëtuar nga Kina. "Gjatë 24 orëve të fundit, janë kontrolluar në Aeroportin e Rinasit 17 pasagjerë shqiptarë dhe të huaj, që kanë udhëtuar nga Pekini dhe Shangai drejt Tiranës, nëpërmjet aeroporteve të tjera. Pas kontrollit të kryer nga njësia e shëndetësisë në aeroport, gjendja e tyre paraqitet e mirë. Ndërkohë që një analizë e kryer në Institutin e Shëndetit Publik te një grua e cila kishte udhëtuar nga Kina 10 ditë më parë, pas testimit për Koronavirus, rezultoi negative", bëhet me dije nga Ministria e Shëndetësisë. E pranishme edhe vetë dje në Aeroportin "Nënë Tereza", ministrja e Shëndetësisë, Ogerta Manastirliu, tha se situata është në monitorim të plotë. "Janë marrë masa në pikat kufitare portuale dhe tokësore me ekipe mjekësore dhe epidemiologe që janë në monitorim të situatës dhe raportojnë në kohë reale për çdo rast", tha Manastirliu.
VIRUSI
Raportohet për 130 persona që kanë humbur jetën si pasojë e Koronavirusit, ndërkohë që numri i të infektuarve ka shkuar në pak ditë në 6 mijë. Raste përveçse në Kinë janë regjistruar edhe në Europë. Nga Organizata Botërore e Shëndetësisë ende nuk është shpallur gjendja e jashtëzakonshme, ndërkohë që intensifikohen përpjekjet për izolimin e virusit. Ministria e Shëndetësisë, në përgjigje të interesit të mediave tha se në vendin tonë ka një laborator të posaçëm për vendosjen e diagnozës së Koronavirusit. Pra, çdo rast i dyshuar, u nënshtrohet testeve shtesë për të kuptuar nëse bëhet fjalë për grip të zakonshëm apo për Koronavirus. "ISHP ka një laborator të standardizuar në lidhje me vendosjen e diagnozës së koronaviruseve e infeksioneve virale dhe stafe të trajnuara për inteligjencën epidemike. Spitali infektiv ka kapacitetet e nevojshme me bokse izolimi për çdo situatë. Shqipëria mbetet vend me
Simptomat e sëmundjes sipas mjekëve përfshijnë: ethe, kollë, gulçim dhe vështirësi në frymëmarrje. Në raste më të rënda, infeksioni mund të shkaktojë pneumoni, sindromë të rëndë respiratore akute, insuficiencë të veshkave, madje edhe vdekje. Rekomandimet standarde për të parandaluar përhapjen e infeksionit përfshijnë larjen e rregullt të duarve, mbulimin e gojës dhe hundës kur kolliteni dhe teshtini, shmangni kontaktin e ngushtë me këdo që tregon simptoma të sëmundjes së frymëmarrjes si kollitja dhe teshtitja.