Akuza e PD: Kreu i SPAK shërbëtor i Edi Ramës
Partia Demokratike akuzoi dje kreun e SPAK- ut, Arben Kraja, se po mbron politikanët e korruptuar. Në një deklaratë për mediat, ish- deputeti i PD- së, Enkelejd Alibeaj, reagoi për vendimin e SPAK- ut për të shpallur moskompetencën për të hetuar dosjen 184, ku sipas PD- së janë kapur zyrtarë të PS- së duke vjedhur vota. Sipas Alibeaj, vendimi i SPAK për ta çuar sërish dosjen në Prokurorinë e Dibrës është politik dhe i shërben vetëm kreut të qeverisë, të cilin ish- deputeti e akuzon se urdhëroi masakrën zgjedhore tri vite e gjysmë më parë në zgjedhjet e pjesshme. “Pas vendimit që synon varrosjen e dosjes 184 dhe çlirimit penal të Edi Ramës e Damian Gjiknurit nga akuzat për vjedhjen e zgjedhjeve, Partia Demokratike e konsideron Arben Krajën një shërbëtor tjetër të Edi Ramës në drejtësi. Ky është një nga ato vendime që minojnë besimin e opinionit publik te Reforma në Drejtësi, për të cilën janë hedhur miliona euro dhe dollarë për t’i dhënë fund pandëshkueshmërisë së zyrtarëve në nivele të larta”, tha Alibeaj. Po ashtu, ish- deputeti i selisë blu e akuzon kreun e SPAK- ut se ka vepruar përkundrejt interesit publik. Sipas Alibeajt, Prokuroria e Dibrës nuk është në gjendje të hetojë krimin zgjedhor, që sipas tij ka ndodhur tri vite e gjysmë më parë. “Duke ridërguar dosjen 184 në Dibër, drejtuesi i SPAK, praktikisht, ka varrosur hetimin e një krimi të dokumentuar zgjedhor, i cili është kusht i Bundestagut gjerman për hapjen e negociatave të anëtarësimit të Shqipërisë në Bashkimin Europian. Juridikisht, nuk ka asnjë dilemë që Arben Kraja mashtron për llogari të Edi Ramës, kur thotë se SPAK- u nuk ka kompetencë për të hetuar Edi Ramën”, tha Alibeaj. Më tej, ai shtoi se PD- ja kishte paralajmëruar se hetimi i dosjes 184, në Dibër, dhe 339, në Durrës, ishte një nga testet kryesore për të vërtetuar nëse do të kishim vërtet një Prokurori të Posaçme Antikorrupsion, por vendimi i kreut të këtij institucioni të ri të drejtësisë, sipas Alibeajt, konfirmon se SPAK- u po rrezikon të kthehet në një shtojcë të Partisë Socialiste.