Lejuan ndërtimet pa leje, lirohen 4 ish- zyrtarët
Policë e zyrtarë të IMT u arrestuan për "Shpërdorim detyre"
Sfumohet superaksioni i Policisë dhe Prokurorisë së Durrësit për lejimin e ndërtimeve pa leje. Nga 19 policët dhe zyrtarët e IMT- së të arrestuar për abuzimet me prona, në burg kanë mbetur vetëm 4 prej tyre, njëri vijon të mbetet në kërkim. Në Gjykatën e Apelit të Durrësit, ditën e djeshme u zhvillua seanca për tetë të arrestuar, pasi pjesën tjetër e liroi më herët Gjykata e Shkallës së Parë. Plot 15 personat e arrestuar ( në total 19) kanë arritur të dalin nga burgu, pasi u ka ndryshuar masa e sigurisë nga Gjykata e Apelit, e cila ua ka ndryshuar në detyrim paraqitjeje.
SEANCA
Në Apel shkuan tetë persona, katër prej të cilëve u liruan, ndërsa katër të tjerë mbetën në burg. Mësohet se, Gjykata e Apelit e Durrësit ( zhvendosur në Kavajës pas dëmtimeve nga tërmeti i 26 nëntorit të vitit të kaluar) ka liruar nga qelitë 4 zyrtarët, më konkretisht Petrit Nezirin, ndihmësspecialist, Policia Manzë; Ndriçim Shikën, ndihmësspecialist, Policia Shijak; Adem Likën, ndërtues dhe Gjergji Gerco, sekretar i Njësisë Administrative Sukth. Ndërkohë, vijojnë të qëndrojnë në qeli Dëshir Dakoli, me detyrë ndihmësspecialist/ SPZ, në Komisariatin e Policisë Durrës; Haxhi Sherra, ndihmësspecialist, Komisariati Shijak; Ermal Petova ( OPGj Manzë); Agim Osmani, ndihmësspecialist, Policia Durrës; Haxhi Sherra, ndihmësspecialist, Komisariati Shijak, ndërsa Gani Dama - polic patrulle është ende në kërkim. Pavarësisht se zyrtarët dhe policët janë lënë të lirë, në detyrim paraqitjeje, Apeli nuk ka rikthyer asnjërin në punë.
RIVLERËSIMI I MASËS
Në seancën e kaluar për rivlerësim të masës së sigurisë të mbajtur rreth tri javë më parë në Gjykatën e Shkallës së Parë në Durrës, në një seancë maratonë që ka zgjatur nga ora 09: 0019: 30, togat e zeza lanë të lirë "shefat" dhe në burg ndihmësspecialistët e sekretarët, si dhe vetëm një ndërtues. Në fillim të muajit janar, Policia e Durrësit prangosi 17 persona në kuadër të operacionit "Abuzuesit". Mes të arrestuarve kishte zyrtarë Policie, inspektorë vendorë, përfaqësues të pushtetit lokal e ndërtues, të akuzuar për veprën penale "Shpërdorim detyre", që është shtrirë përgjatë vitit 2019 në vende dhe kohë të ndryshme. Arrestimi i tyre u bë në kuadër të një hetimi disamujor, me metoda speciale, ku u dokumentua me prova ligjore veprimtaria e kundërligjshme e subjekteve të këtij procedimi, të cilët duke keqpërdorur atributet që u jepte detyra dhe funksioni, në bashkëpunim me njëri- tjetrin, por dhe me shtetas të tjerë, kanë konsumuar veprën penale të "Shpërdorimit të detyrës" dhe "Ndërtim të paligjshëm, në bashkëpunim". Subjektet e këtij procedimi penal kryenin funksione publike në Policinë e Shtetit, nëpunës të Njësive Administrative, IKMTve dhe INUV- it në Durrës, Shijak dhe Manzës. Të arrestuarit kishin krijuar një mekanizëm korruptim, me qëllim përfitimin e parave, ndërsa në këmbim jepnin lejet për ndërtime të shumta të paligjshme si objekte banimi, magazina, objekte biznesi etj. Me anë të kësaj skeme abuzive, ata shmangnin zbatimin e legjislacionit në fushën urbanistike dhe sigurimit teknik të tyre. Por përveçse kanë favorizuar biznesmenët të ndërtojnë pa leje, kanë falsifikuar dokumentet, nuk kanë raportuar ngjarjet kriminale, dhe më tej akoma, kanë fshehur kallëzimet e bërë nga qytetarë të ndryshëm për abuzimet që po ndodhnin në këto zona me ndërtimet pa leje. Sipas dosjes hetimore, Policët i lejonin ndërtimet pa leje kundrejt pagesave nga 1500 deri në 7 mijë euro.