Shpresat për Qeveri në Kosovë, në telefonat e Kurtit e Mustafës
Kurti: Me qasjen ‘ merre ose lëre’ s’mund të arrijmë marrëveshje
Formimi i Qeverisë së Kosovës ka mbetur në fatin që mund të sjellë shkëmbimi i mesazheve apo telefonatave mes Albin Kurtit dhe Isa Mustafës në më pak se gjashtë ditë kohë që i kanë mbetur Kurtit nga afati kushtetues për paraqitjen e kabinetit.
Pas takimit me ambasadorët e pesë vendeve të Quint- it dhe shefen e zyrës së BE- së nuk ka ndryshuar asgjë. Të mërkurën, të dyja partitë nuk kanë bërë deklarata publike, asnjë njoftim për takime të reja apo nëse Kurti e Mustafa janë duke komunikuar. Afati kohor që ka Lëvizja Vetëvendosje për formimin e Qeverisë tashmë është drejt fundit. Afrimi i 4 shkurtit rrit shqetësimet se nuk do të ketë fare koalicion mes dy partive. Që para zgjedhjeve të 6 tetorit, LDK dhe LVV e kishin deklaruar të sigurt marrëveshjen dhe pas zgjedhjeve, thanë se presin vetëm certifikimin e rezultateve të 6 tetorit nga KQZ, për të shpallur koalicionin bashkëqeverisës. Ata u zotuan se nuk do të përplasen për poste. Por në negociatat nëntor- dhjetor palët ranë parimisht për ministritë, Kryeministrin dhe Kryeparlamentarin, por u përplasën për postin e Presidentit në përfundim të mandatit të Presidentit aktual, Hashim Thaçi. LDK donte që LVV të premtonte mbështetjen për emrin që do të propozonte LDK- ja, pa ofruar asnjë emër konkret, ndërsa LVV donte që ose LDK të jepte një emër konkret sepse ata nuk mund të mbështesnin cilindo, ose ta linin diskutimin për postin e Presidentit në kohën kur të afrohej fundi i mandatit të Presidentit Thaçi. LDK këmbënguli se kjo nuk ishte çështje postesh, por çështje mirëbesimi, të cilin LVV duhej t’ia jepte nëse dëshironin një bashkëqeverisje të plotë. Në dhjetor, një ditë para konstituivit të Kuvendit të ri, nëpërmjet një videoje, Kurti tha se nuk ka marrëveshje me LDK- në dhe i vjen keq që po shkojnë në seancë pa një propozim për qeverinë. Duke thyer të gjitha diskutimet e deriatëhershme me LDK, Kurti propozoi një kryeparlamentar nga Vetëvendosje, të cilin LDK e miratoi. Me rikthimin në bisedime në janar, LDK kërkon sërish postin e kryeparlamentarit dhe shkarkimin e të sapozgjedhurit Glauk Konjufca, gjë që nga Vetëvendosje e quajnë tallje me institucionin. Të martën pas takimit, liderët e dy partive e bënë të qartë se marrëveshja është larg. Isa Mustafa ka kërkuar edhe një herë nga LV- ja që të heqin dorë nga qëndrimi për postin e spikerit të Kuvendit. Ndërsa lideri i Vetëvendosjes, Albin Kurti, tha se “Nuk ka përafrim të pozicioneve nga ana e LDK- së, ata insistojnë në propozimin e tyre të vjetër të datës 8 janar... Me qasjen ‘ merre ose lëre’ nuk mund të arrijmë marrëveshje”. Kurti shtoi se nuk do t’i ndalë përpjekjet për formimin e qeverisë.