ZBARDHET VENDIMI Kompensimi, pronarët që do marrin paratë në dorë
Qeveria ndryshon skemën e kompensimit të ish- pronarëve. Gazeta zbardh vendimin me kategoritë që marrin paratë në dorë. Ndryshon edhe ligji i shpronësimeve
U miratua dje në Komisionin e Ligjeve projektligji me titull "Për disa ndryshime dhe shtesa në ligjin për shpronësimet dhe marrjen në përdorim të përkohshëm të pasurisë, pronë private për interes publik", që synon ngritjen e Agjencisë Shtetërore të Shpronësimeve.
Kjo agjenci e re që pritet të ngrihet brenda këtij viti, menjëherë pas miratimit të ligjit edhe në Kuvend, do të ketë si përgjegjësi të saj të gjitha proceset e shpronësimeve në Shqipëri. E pranishme gjatë diskutimit në komision, ishte edhe ministrja e Infrastrukturës, Belinda Balluku, që tregoi disa nga lehtësirat që do të sjellë ngritja e kësaj strukture në procedurat e shpronësimeve. Balluku u shpreh optimiste që me këtë agjenci të re, që do të merret me të gjitha proceset e shpronësimeve në Shqipëri do të shkurtohen shumë procedurat burokratike." Ngritja brenda këtij viti e Agjencisë Shtetërore të Shpronësimeve për interes publik, do të eliminojë problemin e mbartur të shpronësimeve. Kjo agjenci do të përqendrojë të gjitha procedurat e shpronësimeve, duke garantuar zgjidhje të çdo rasti kur kërkohet shpronësim nga secili institucion shtetëror dhe reduktuar kështu burokracisë në këtë proces. Respektimi i afateve të kompensimit të shpronësimeve në këtë ligj janë të përcaktuara qartë, duke i dhënë mundësi pronarëve që të shpronësohen në mënyrë sa më të shpejtë palët. Ky është një proces që sot ne kemi gjyqe të hapura, për sa i përket vlerësimit të truallit, gjë e cila do të marr fund", u shpreh Belinda Balluku. Ministrja e Infrastrukturës theksoi në fjalën e saj se krijimi i kësaj strukture të re nuk do të çojë në rritjen e çmimit të shpronësimeve. "Krijimi i agjencisë nuk do të ndryshojë çmimin e shpronësimit. Ajo bëhet sipas akteve në fuqi dhe, kur flasim për tokën, ajo bëhet nëpërmjet një VKM- je dhe çmimit referencë të tokës, që është e njëjta që përdor Agjencia e Pronave", tha Balluku. I vetmi zë skeptik në lidhje me këtë ligj, ishte ish- ministri i Brendshëm, Fatmir Xhafaj, i cili ngriti shqetësimin e shtimit të konflikteve ndërinstitucionale. "Mendoni se kjo zgjidhje do lehtësojë apo do krijojë konflikte të reja institucionale? Unë uroj që mos të ketë fatin e Kadastrës edhe të avokaturës të shtetit", tha Xhafaj.