Presioni nga PPE, qeveria tërhiqet nga Antishpifja
Balla: “Votimi për dekretin të shtyhet derisa të kemi opinionin e Venecias”. Meta: “Reflektimi i shërben një qëllimi të madh”
Maxhoranca u tërhoq dje përkohësisht nga dy projektligjet që përmbajnë Paketën Antishpifje.
Përkundër deklaratave të mëparshme të përfaqësuesve të maxhorancës se do të rrëzonin dekretin e Presidentit për Paketën Antishpije në seancën e së enjtes, kryetari i Grupit Parlamentarë Socialist, Taulant Balla, i kërkoi kryeparlamentarit Ruçi që ta shtyjë votimin e dekretit për një moment të dytë, pasi të ketë mbërritur opinioni i Komisionit të Venecias. “Dua t’ju informoj se sapo më ka ardhur komunikimi që Komisioni i Venecias ka pranuar të shqyrtojë me procedurë të përshpejtuar këtë ligj. Gjatë muajit shkurt, përfaqësuesit e Komisionit të Venecias do të vijnë në Tiranë për të dialoguar me këdo. Në këtë kontekst, z. Kryetar i Kuvendit, dua të propozoj që diskutimi dhe votimi i dekretit për mediat audio- vizive të shtyhet derisa Komisioni i Venecias të sjellë raportin e vet”, tha Balla. Numri dy i PS- së tha dje se maxhoranca ka pasur kontakte të vazhdueshme me ekspertët e Këshillit të Europës për Paketën e Antishpifjes dhe pasi ata kanë kërkuar më shumë informacion në lidhje me dy pika, atëherë kanë dakordësuar që sipas Ballës, bashkërisht t’i kërkojnë Venecias një opinion. Tërheqja e maxhorancës erdhi pas paralajmërimeve të raporterit për Shqipërinë i Partive Popullore në Parlamentin Europian, David Lega, se nëse Parlamenti do të miratonte dy ligjet e censurës së medias, do të rrezikonte seriozisht hapjen e negociatave në mars të këtij viti. “Jam i shqetësuar për votimin sot në Shqipëri. Është problematike për zhvillimet demokratike, si dhe për negociatat e anëtarësimit në të ardhmen”, shkroi Lega. Këtë shqetësim, Lega e ndau edhe një ditë më parë përmes një postimi në “Tëitter”.
REAGIMI Pak minuta pasi maxhoranca u tërhoq nga rrëzimi i dekretit të Presidentit Meta për ligjin e censurës, reagoi edhe ky i fundit duke e cilësuar një lajm shumë të mirë. Në një prononcim për mediat, Meta tha se kjo nuk konsiderohet si fitore për të apo si humbje për maxhorancën, e cila kishte deklaruar se do rrëzonte dekretet e tij, por si një fitore për fjalën e lirë. “Ky është një moment pozitiv mendoj. Lajm shumë i mirë, nuk është humbje për askënd. Reflektimi i sotëm i shërben një qëllimi më të madh të përbashkët, që është mbrojtja e të drejtave kushtetuese të të gjithë qytetarëve shqiptarë dhe njëkohësisht garantimit të standardeve demokratike dhe europiane”, u shpreh Meta. Presidenti do të përballet me maxhorancën në Komisionin e Venecias në të njëjtën ditë që do të shqyrtohet edhe paketa e antishpifjes. Por kreu i shtetit do të përballet me kuvendin për çështjen e emërimit të anëtarëve të gjykatës kushtetuese.