Pengmarrja e Jan Prengës, Policia kontrolle në Shkodër e Shijak për urdhëruesit
Një nga të kërkuarit si organizator, Gentian Doçi, komunikoi me vëllain: E di shumë mirë ku e ke vëllain. Më ke prekur mallin
Policia e Shtetit ka vijuar edhe dje operacionin "Resorti", për arrestimin e personave në kërkim, që dyshohen për pengmarrjen e Jan Prengës, por edhe për gjetjen e vendit ku mund të jetë fshehur trupi i pajetë i 48- vjeçarit.
Burime nga grupi hetimor konfirmuan se një nga personat, për arrestimin e të cilit po kërkohet intensivisht, është edhe Gentian Doçi. Ky person, i skeduar nga autoritetet e vendeve të Bashkimit Europian, konsiderohet si njeriu kyç që urdhëroi rrëmbimin e Jan Prengës. Madje, ky person ka pasur edhe një telefonatë me vëllain e 48- vjeçarit, i cili ndodhet në Mbretërinë e Bashkuar, duke i qartësuar arsyet e pengmarrjes. Teksa vëllai i Jan Prengës e pyeste Gentian Doçin për vendndodhjen e të vëllait, duke hyrë në këtë formë edhe në negociata për lirimin e tij, ai i është shprehur: "Ti e di shumë mirë se ku e ke vëllain. Më ke prekur mallin". Pas kësaj telefonate, familjarët e 48- vjeçarit kanë nisur bisedimet përmes pajtuesve të gjaqeve, në mënyrë që të lirohej i afërmi i tyre. Megjithatë, kjo nuk ka ndodhur në kohë dhe negociatat janë ndërprerë në momentin që Policia i ka lajmëruar familjarët për vdekjen e Jan Prengës.
KONTROLLET Policia tha dje se në vijim të operacionit "Resorti", Sektori për Krimet e Rënda në Drejtorinë Vendore të Policisë Tiranë, në bashkëpunim me Forcën e Posaçme Operacionale në Policinë e Shtetit, forcat RENEA dhe Policinë e Shkodrës, kanë vijuar kontrolle të pandërprera, me qëllim sigurimin e provave për zbardhjen dhe dokumentimin e plotë të pengmarrjes. Gjithashtu, kontrolle janë kryer edhe për kapjen e autorëve të tjerë të përfshirë në këtë ngjarje me pasojë humbjen e jetës së shtetasit Jan Prenga. Në këtë kuadër, në qytetin e Shkodrës dhe rrethinat e saj, mëngjesin djeshëm, janë ushtruar kontrolle në banesa, biznese, magazina e objekte të braktisura dhe si rezultat i kontrollit janë siguruar prova të vlefshme që shërbejnë për zbardhjen dhe dokumentin e plotë të ngjarjes. "Sektori për Krimet e Rënda në Policinë e Tiranës, në bashkëpunim me
Prokurorinë, vijon veprimet për sigurimin e çdo prove të vlefshme që i shërben ngjarjes, si dhe për kapjen e personave të tjerë që janë të implikuar në këtë ngjarje", tha dje Policia. Ndërsa disa orë më vonë, në një njoftim të dytë, Policia sqaroi se disponon prova të pakundërshtueshme se shtetasi Jan Prenga ka ndërruar jetë më datë 17 janar, pra, ditën e rrëmbimit dhe se në resort është dërguar pa shenja jete.
TE ARRESTUARIT Para tri ditësh, Policia e Shtetit njoftoi zyrtarisht se kishte zbardhur pengmarrjen e Jan Prengës, ngjarje e ndodhur më 17 janar në Kamzë, i cili dyshohet se është dhunuar për vdekje nga autorët, por trupi i tij ende nuk është gjetur. Katër persona u arrestuan gjatë operacionit të së hënës, që forcat RENEA zhvilluan në rrethinat e Shijakut, mes të cilëve edhe babai e vëllai i Altin Hajrit, i cili konsiderohet si kreu i grupit. Në kuadër të operacionit të koduar "Resorti", ditën e hënë, u bë e mundur kapja dhe ndalimi i shtetasve: Leonard Hajri, 35 vjeç, i dënuar më parë, Olsi Tarja, 36 vjeç, Elton Hajri, 32 vjeç dhe Bajram Hajri, 64 vjeç, banues në Shijak. Policia sekuestroi 2 armë zjarri pistoleta, një sasi municioni, 16 aparate celularë, 4 automjete dhe një shumë eurosh. Policia tha se nga veprimet e thelluara hetimore ka rezultuar se personat, pas rrëmbimit të shtetasit Jan Prenga, kanë shkuar direkt në resortin në pronësi të shtetasit Altin Hajri, i shpallur në kërkim. Ndërsa mbrëmjen e së martës, Forcat Operacionale arrestuan në Kavajë Festim Bexhdilin, 30 vjeç. Ky i fundit dyshohet se ka bashkëpunuar në fshehjen e trupit të 48- vjeçarit Prenga, pasi ka vdekur gjatë torturave.