Me vendim “Komiteti”, si do konfiskohen pronat me paketën “anti- KÇK”, SHBA e BE: S’e kemi parë ende
NGA DREJTORI I BURGJEVE TE KREU I SHÇBA, EMRAT E 40 KANDIDATEVE PER KRYETARIN E BKH
Qeveria miratoi dje paketën “anti- KÇK”, përmes së cilës do të sekuestrojë dhe konfiskojë pasurinë e çdo të dënuari dhe personi nën hetim për vepra penale.
Akti Normativ ka një efekt të përkohshëm dhe pritet që deri më 31 dhjetor të këtij viti, të kenë kaluar në sitë të gjithë të dyshuarit që kanë krijuar pasuri përmes veprimtarisë kriminale. “Qëllimi i këtij akti normativ është ndërhyrja emergjente dhe me karakter të përkohshëm në kushtet e nevojës së forcimit dhe ashpërsimit të luftës kundër krimit të organizuar, organizatave dhe grupeve të strukturuara kriminale, si dhe çdo grupi tjetër kriminal e terrorist, bandave të armatosura, individëve të përfshirë në krimet e rënda, me synim konsolidimin e sigurisë në vend, përmes rritjes së kapacitetit dhe nivelit të zbulimit, gjurmimit dhe parandalimit të krimit të organizuar, krimeve të rënda, terrorizmit dhe përdorimit prej krimit të organizuar të pronave me origjinë të paligjshme”, thuhet në nenin 2 të këtij akti.
SUBJEKTET Në nenin 5 të këtij akti përcaktohen subjektet, me të cilët do të merret struktura e re që do të ngrihet. Subjekte të Aktit Normativ janë personat që deri në momentin e hyrjes në fuqi të këtij Akti Normativ, janë denuar me vendim penal të formës së prerë, brenda apo jashtë territorit të Republikës së Shqipërisë; Personat, që deri në momentin e hyrjes në fuqi të këtij Akti Normativ, janë persona nën hetim brenda apo jashtë territorit të Republikës së Shqipërisë; Personat fizikë dhe juridikë, shtetas shqiptarë apo të huaj, si dhe persona pa shtetësi, për të cilët ka filluar procedura e shpalljes apo për të cilët ekzistojnë dyshime të bazuara në elementë të faktit për përfshirje në çdo formë të terrorizmit dhe të financimit të tij, të kryera brenda ose jashtë territorit të Republikës së Shqipërisë, sipas parashikimit të legjislacionit në fuqi, për masat kundër financimit të terrorizmit, të cilët nuk kanë marrë vendim pafajësie nga gjykatat”, thuhet në Aktin Normativ të qeverisë. Struktura Për zbatimin e këtij Akti Normativ do të ngrihet Komiteti Kombëtar i Koordinimit për Parandalimin dhe Luftën Kundër Krimit të Organizuar, i cili përbëhet nga drejtues të lartë të organeve ligjzbatuese. “Komiteti kryesohet nga ministri i Brendshëm dhe ka në përbërje ministrin e Drejtësisë, ministrin e Financave dhe Ekonomisë, Prokurorin e Përgjithshëm, drejtuesin e Prokurorisë së Posaçme kundër Korrupsionit dhe Krimit të Organizuar, drejtorin e Shërbimit Informativ të Shtetit, drejtorin e Përgjithshëm të Policisë së Shtetit, drejtorin e Qendrës së Koordinimit kundër Ekstremizmit të Dhunshëm, drejtorin e Përgjithshëm të Drejtorisë së Parandalimit të Pastrimit të Parave”, thuhet në nenin 8 të këtij akti. Struktura bazë që synohet të sjellë rezultate në zbatim të këtij akti do të jetë OFL. “Operacioni Forca e Ligjit ( OFL) është strukturë e veçantë në Drejtorinë e Përgjithshme të Policisë së Shtetit për parandalimin, zbulimin, dokumentimin dhe goditjen e krimit të organizuar dhe krimeve të rënda”, thuhet në akt.
PASURIA Përmes këtij akti, shteti do të sekuestrojë dhe konfiskojë pas gjykimit çdo pasuri të pajustifikueshme ose të vënë përmes veprimtarisë kriminale. “Gjykata vendos masen parandaluese pasurore te konfiskimit sipas parashikimit të kësaj pike kur: mbi pasurinë është vendosur masa e sekuestros; ka dyshime të arsyeshme, bazuar në elemente të faktit, për pjesëmarrjen e personit në veprimtari kriminale, të parashikuara në nenin 5 të këtij Akti Normativ; nuk mund të provohet përpara gjykatës origjina e ligjshme e burimit të krijimit të pasurisë apo personi nuk justifikon zotërimin e pasurive ose të të ardhurave, që janë shpërpjesëtimore dhe nuk i përgjigjen dukshëm nivelit të të ardhurave, fitimeve apo veprimtarive të ligjshme, të deklaruara dhe as nuk justifikohen prej tyre”, thuhet në nenin 23 të këtij akti. Po ashtu, edhe transferimet e pasurisë te persona të tretë do të konfiskohen nga shteti nëse nuk justifikohet burimi i tyre. “Kur vërtetohet se disa pasuri i janë transferuar apo janë regjistruar në emër të të tretëve, me veprime juridike fiktive ose të simuluara, Gjykata konstaton pavlefshmërinë e këtyre veprimeve juridike. Për këtë qëllim, kur nuk provohet e kundërta, prezumohen fiktive ose të simuluara. Në asnjë rrethanë, subjektet e këtij Akti Normativ nuk mund të përdorin si argument apo provë se të ardhurat për krijimin apo fitimin e aseteve dhe pasurive, objekt hetimi, janë burim i evazionit fiskal. Të ardhurat e padeklaruara konsiderohen të paligjshme për sa subjekti nuk provon të kundërtën. Në këtë rast, kundër subjektit mund të ngrihet një proces i rregullt penal sipas legjislacionit në fuqi”, thuhet në Aktin Normativ të qeverisë. Neni 26 i aktit përcakton se “pasuritë e konfiskuara me vendim Gjykate, sipas këtij Akti Normativ, kalojnë në pronësi të shtetit në mënyrë të pakthyeshme”. Qeveria me Aktin Normativ është kujdesur që vendimet e gjykatave të jenë të shpejta. “Gjykata duhet të shprehet me vendim për konfiskimin e pasurive të sekuestruara, brenda 6 muajve nga data e paraqitjes së kërkesës për konfiskim”, thuhet në nenin 24 të këtij akti.