Rindërtimi, Rama shpalos Programin, ku do rindërtohet në 7 bashki
"Procesi i vlerësimit të thelluar do përcaktojë fatin e godinave të pabanueshme. Vetëm pas këtij procesi vendosin ekspertët"
Kryeministri Rama shpalosi dje planin e rindërtimit në 7 bashki të vendit, që pësuan dëmet më të mëdha nga tërmeti i 26 nëntorit.
Përmes një sqarimi në rrjetet sociale, Rama ka treguar numrin e zonave të zhvillimit në këto bashki dhe mënyrën sesi do të procedohet. Në postimin e tij, Rama shkruan se pas këtyre zonave në Tiranë, Durrës, Krujë, Shijak, Vorë, Kavajë dhe Kurbin, do të vijojë studimi edhe për zhvillimin e të tjera zonave në këto qytete. Krahas studimeve, Rama njoftoi se në Laç ka nisur procesi i shpronësimit të objekteve dhe në Thumanë dhe Shijak kanë filluar kontaktet me kompanitë që do të marrin përsipër ndërtimin e objekteve të reja. Ndërkohë, për shtëpitë që do të ndërtohen në zonat rurale, Kryeministri Rama shkroi se do të bëhet një studim i thelluar në lidhje me variantet për mënyrën sesi ato do të ngrihen. "Enti Kombëtar i Banesave ka hapur garën për modelet e njësive individuale të banimit. Është firmosur kontrata për hartimin e modeleve dhe në 6 shkurt pritet dorëzimi i tyre. Më pas, njësitë zbatuese do të nisin procesin ligjor të zbatimit, nga prokurimi deri te ndërtimi i shtëpive", theksoi Kryeministri. Rama veçoi edhe procesin e vlerësimit të dëmeve në godina, duke shtuar se vetëm pas kësaj procedure do të merret vendimi për shembjen ose jo të tyre. "Procesi i vlerësimi të thelluar. Ky proces që po zhvillohet intensivisht, pikë për pikë sipas ligjit, është vendimtar për fatin e godinave të pabanueshme. Vetëm pas këtij procesi vendoset, në bazë të vlerësimit të ekspertëve, nëse godina duhet shembur", shtoi Rama. Më vonë, gjatë ditës së djeshme, Kryeministri ka shkuar në Durrës për të parë nga afër procesin e rindërtimit të banesave, që pësuan dëmeve të pjesshme dhe ku nuk ishte cenuar struktura mbajtëse.