Zgjedhjet e parakohshme, Balla: Fantazi e Bashës
"Mos i fyej ata që i fute vetë në Kuvend, PS nuk i ka 84 vota"
Sekretari i Përgjithshëm i PS- së, Taulant Balla, ka mohuar çdo mundësi për një pakt mes maxhorancës dhe opozitës jashtë Parlamentit, që pas Reformës Zgjedhore të shkohet drejt zgjedhjeve të parakohshme.
Përmes një postimi në rrjetin social "Facebook", Balla e quan fantazi deklaratën e kreut të PD- së, Basha, se vendi do të shkojë në zgjedhje të parakohshme fill pas përfundimit të Reformës Zgjedhore. Për Ballën, dialogu ka nisur për Reformën Zgjedhore dhe brenda kornizës së qartë të rekomandimeve të OSBE/ ODHIR. "Lulzim Basha paska ' konfirmuar' marrëveshje për zgjedhje të parakohshme! Mbase kjo i vlen si një fantazi e re për të mbajtur ca muaj të tjerë me oksigjen simotrën dhe sivëllezërit e aleancës jashtëparlamentare dhe e mirëkuptojmë. Por zgjedhjet e parakohshme nuk janë temë e dialogut me atë aleancë, d. m. th., as me Lulzim Bashën. Dialogu ka nisur për Reformën Zgjedhore dhe brenda kornizës së qartë të rekomandimeve të OSBE/ ODHIR. Prandaj nga Lulzim Basha dhe aleanca jashtëparlamentare mirëpritet çdo kontribut me ide për depolitizimin e administratës zgjedhore dhe për çdo rekomandim tjetër. Idetë jashtë kësaj kornize, kryetari i PDsë mund t'i diskutojë dhe konfirmojë jashtë Parlamentit me aleancën e tij, por jo me Partinë Socialiste", shkruan Balla në rrjetet sociale. Më tej, numri 2 i PS- së në Kuvend thekson se PD dhe kreu i saj, Basha, duhet t'i ndalojë sulmet ndaj deputetëve të opozitës së re në Kuvend, duke theksuar se ata i ka futur me firmën e tij dhe se do jenë të domosdoshëm për votimin e Reformës Zgjedhore. "Ndërkohë i kujtojmë
Lulzim Bashës se Kodi Zgjedhor miratohet me 84 vota, që Partia Socialiste nuk i ka! Prandaj, ai bën mirë të mos i fyejë e ofendojë deputetët që janë në Kuvend me firmën e tij dhe të paraardhësit të Monika Kryemadhit. Sepse jo për gjë, po nesër do të duhet edhe vota e tyre për të mbështetur dhe konfirmuar rezultatet e dialogut që po zhvillojmë dhe Lulzim Basha bën mirë të mos i provokojë në dëm të reformës. Sqaroj se e dhashë unë këtë përgjigje, sepse kryetari Rama është plotësisht i angazhuar me rindërtimin dhe angazhimet e tjera të mëdha si Kryeministër dhe si Kryetar i OSBE gjatë vitit 2020. Prandaj, nuk merret asnjë minutë dhe as nuk mund të prononcohet për çështjet që lidhen me bashkëpunimet apo ndërveprimet partiake. Kjo vlen për këtë herë dhe për të gjitha herët kur partia do të reagojë politikisht ndaj PD- së ose Lulzim Bashës lidhur me Reformën Zgjedhore, ndërkohë ecuria e dialogut me përfaqësuesit e PD- së i është besuar unanimisht përfaqësuesit tonë, Damian Gjiknuri. Dje, kryetari i Partisë Demokratike gjatë një intervistë në "Abc neps", theksoi se krijimi i një qeverie tranZitore 100 ditë para zgjedhjeve dhe bashkimi i tyre me zgjedhjet lokale është një nga pikat që do të pasojë përfundimin e Reformës Zgjedhore.