Shtesa e pensionit për 3 kategori, si llogaritet
Si lidhen vitet e punës me shtesën e pensionit. Skema e re për përfitimin dhe vendimet e fundit me emrat e minatorëve, metalurgëve dhe naftëtarëve
Prej nëntorit të vitit të kaluar, Instituti i Sigurimeve Shoqërore ka nisur llogaritjen e shtesës për minatorët, naftëtarët dhe metalurgët. Gazeta boton sot dy vendimet e fundit e ISSH- së, me emrat e përfituesve që iu është llogaritur shtesa dhe që mund ta tërheqin atë në çdo pikë shpërndarjeje.
Janë mbi 7 mijë pensionistë për të cilët ka nisur trajtimi me pensione suplementare, ndërkohë që vijon puna për shqyrtimin e çdo aplikimi të kryer nga minatorët, naftëtarët dhe metalurgët. Kreu i ISSH- së, Hado, ka garantuar, se nuk do të penalizohet askush që ka dorëzuar kërkesë dhe se lidhja e shtesës për secilin prej tyre është vetëm çështje ditësh.
LLOGARITJA
Por si llogaritet përfitimi? Rritja për minatorët, sipas ligjit, është me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Këtë shtesë mbi pension, sipas ligjit, e përfitojnë të gjithë personat që kanë jo më pak se 6 vite në profesionet dhe punët e përcaktuara të vështira dhe shumë të vështira. Për ta konkretizuar, nëse një ish- punonjës i nëntokës merr aktualisht një pension mujor prej 25 000 lekë dhe ka punuar në nëntokë 20 vite, të cilat i ka të dokumentuara saktësisht ashtu si përcakton vendimi nr. 526/ 1949, i ndryshuar, ai do të marrë një shtesë prej 20 për qind të masës së pensionit, pra 5000 lekë në muaj. Pas kësaj, shuma e përfitimeve do të arrijë 30 000 lekë në muaj. Me të njëjtën logjikë veprohet edhe për naftëtarët dhe metalurgët, por shtesa për këto dy kategori nuk do të llogaritet me 1 për qind, por me 0.6 për qind për çdo vit pune në sektor. Pra, nëse një naftëtar merr një pension prej 27000 lekësh në muaj dhe ka 20 vite punë në industrinë e naftës, në punë shumë të vështira, të njohura për përfitim sipas këtij ligji, shtesa mbi pension do të jetë 12 për qind ose 3240 lekë në muaj. Pjesë e skemës së trajtimit me pensione suplementare, krahas pensionistëve, janë edhe ata në marrëdhënie pune, por që kanë mbushur moshën 48 vjeç. Lidhur me këtë kategori, llogaritjet për pensionet e parakohshme bëhen bazuar në pagat mbi të cilat janë derdhur kontributet dhe periudhat e sigurimit, ashtu si përllogariten edhe pensionet e pleqërisë.
SHTESA
Ndonëse aplikimi i shtesës do të nisë në shkurt, efektet do të jenë që nga data 5 korrik. Pra, në muajin shkurt, pensionistët përfitojnë rishtazi krahas shtesës së këtij muaji edhe shtesën e 6 muajve paraardhës. Gjithsej, sipas të dhënave të ISSH- së, janë rreth 23,400 pensionistë që përfitojnë nga skema e trajtimeve suplementare.