“Forca e Ligjit” i kërkon Lulzim Berishës e Ardian Çapjas të deklarojnë pasurinë
Agjentja e OFL: Këta individë duhet t’u përgjigjen me shkrim brenda 48 orëve të gjitha pyetjeve. Përgjigjet e marra do t’i dërgohen SPAK- ut
Agjentja e OFL, në një tjetër dalje publike dje, deklaroi se u është kërkuar deklarimi i burimit të pasurisë dy personave në Durrës e Elbasan, të dyshuar për disa vepra penale, në zbatim të Ligjit Special.
Mësohet se këta persona janë Lulzim Berisha dhe Ardian Çapja. “Në vijim të operacionit Forca e Ligjit, informojmë opinionin publik se në zbatim të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL sapo i ka nisur kërkesat me shkrim për deklarimin e burimeve të pasurisë, subjekteve: L. B. dhe A. Ç.”, deklaroi agjentja e OFL. Më tej, ndonëse u referohej me iniciale, ajo u shpreh se: “L. B., 49 vjeç, lindur dhe banues në rrugën ‘ Adria’, Durrës, drejtues i një grupi kriminal, autor i veprave penale ‘ Grupi i strukturuar kriminal’, ‘ Trafikimi i narkotikëve’, ‘ Pastrimi i produkteve të veprës penale ose veprimtarisë kriminale’. Ky shtetas, në vitin 2012, është dënuar me burgim të përjetshëm nga Gjykata e Krimeve të Rënda dhe në vitin 2016 Gjykata e Apelit Durrës ka vendosur lirimin e tij me kusht. A. Ç., 52 vjeç, i arrestuar në flagrancë për veprat penale ‘ Vrasja e punonjësve të policisë, e mbetur në tentativë’ dhe ‘ Armëmbajtja pa leje’. Ky shtetas dyshohet si organizator i një sërë vrasjesh të ndodhura në qytetin e Elbasanit për motive hakmarrjeje. Dyshohet se ky shtetas, së bashku me të afërm të tij, ka kryer vrasje me pagesë në periudhën 2009- 2016".
KERKESA Si subjekt i Ligjit Special, këta individë duhet t’u përgjigjen me shkrim, brenda 48 orësh, të gjitha pyetjeve të OFL- së. Më pas, përgjigjet e marra do t’i dërgohen SPAK- ut, i cili brenda jo më shumë se 15 ditësh, duhet të vlerësojë dosjen e përgatitur nga OFL- ja mbi aktivitetin kriminal të këtyre subjekteve, si edhe pasurinë e tyre. Sapo të bëjë këtë vlerësim, SPAK- u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj, Gjykata Speciale duhet të vendosë për konfiskimin përfundimtar të tyre. “Sqarojmë se me marrjen e masës së sekuestros, çdo biznes, mjetet motorike apo tokat në pronësi të subjekteve administrohen nga agjencia e posaçme e Ministrisë së Brendshme. Vetëm banesa mund të vazhdojë të përdoret për strehim, po as mund të shitet, të blihet apo të jepet me qira nga subjekti”, shtoi agjentja e OFL.
AKSIONI
Në vazhdim të aksionit të nisur ditën e hënë, Operacioni Forca e Ligjit, lidhur me pengmarrjen e Jan Prengës në Kamzë, më 17 janar, ka kryer disa sekuestrime në Shkodër, pas urdhrit të nxjerrë nga drejtori i Përgjithshëm i Policisë së Shtetit. Bëhet fjalë për pasuritë në emër të 6 personave nga Shkodra që janë të shpallur në kërkim në lidhje me pengmarrjen dhe zhdukjen apo fshehjen e kufomës së Jan Prengës. Janë sekuestruar banesa, sipërfaqe trualli automjete, motorë, vila, etj., në pronësi të shtetasve Aldo Manishta, Ardian Doçi, Artan Doçi, Gentian Funiqi ose Gentian Doçi, Martin Bleta.