Ambasadorja e SHBA: Testi i së vërtetës, kundër korrupsionit

Njësia e re do të fillojë punë me kandidatët për Byronë

Në Ministrinë e Brendshme janë diplomuar 5 poligrafët e parë, të trajnuar nga Shtetet e Bashkuara të Amerikës për përdorimin e "makinës së të vërtetës".

Në ceremoninë e diplomimit ishte e pranishme edhe ambasadorja e SHBAsë, Yuri Kim, e cila e konsideroi këtë moment të rëndësishëm, pasi këta të diplomuar do të përdorin pajisjet poligrafike te kandidatët e Byrosë Kombëtare të Hetimit. Në fjalën e saj, Kim shtoi se të diplomuarit do të asistohen nga ekspertja amerikane. Ndërsa shtoi se njësia e poligrafit në SHÇBA është një tjetër armë kundër korrupsionit në Shqipëri. Në përfundim të fjalës së saj, Yuri Kim tha se SHBA do të vazhdojnë të jetë një mbështetje sa i takon përparimit në Reformën në Drejtësi. "Jam e kënaqur kur shoh suksesin e këtyre 5 studentëve, që bënë 400 orë në shkencat e poligrafisë. Kanë studiuar psikologjinë, teknikat e intervistimit dhe teknikat e testit. Instruktorja e ka vlerësuar përkushtimin e tyre dhe disiplinën e tyre në kurs. Dua të shpreh falënderimin tim për eksperten Lori Kosiarek për punën që ka bërë. Zonja Kosiarek i ka bërë këta studentë pjesë të jetës së saj dhe do të punojë në praktikë për ta. Më lejoni të përsëris, ky është një moment shumë i rëndësishëm i Shqipërisë, por edhe i të diplomuarve. Shqipëria ka ligjin e ri për SPAK- un, që kërkon që anëtarët e BKH- së t'i nënshtrohen testit të poligrafit. Ata janë një tjetër armë në arsenalin e Shqipërisë për të luftuar korrupsionin, një tjetër mundësi për të forcuar shtetin ligjor. Jemi këtu për të përuruar edhe njësinë e poligrafit në SHÇBA. Kjo njësi do fillojë të kryejë kontrollin e kandidatëve për drejtimin e BKH- së. SHBA qëndron me qeverinë shqiptare për të larguar korrupsionin nga sistemi i drejtësisë penale. Dua t'u them të diplomuarve ' unë besoj te ju' dhe dua t'i them popullit shqiptar ' unë besoj te ju", tha Kim.

MINISTRI

Ditë historike e konsideroi ministri i Brendshëm, Sandër

Lleshaj, diplomimin e studentëve të parë në këtë fushë të panjohur në Shqipëri. Sipas ministrit, makina e së vërtetës nuk do të përdoret vetëm për kandidatët e Byrosë, por në vazhdim për të gjithë ata që do të rekrutohen. "Ky instrument nuk do të përdoret vetëm për SPAK- un, për BKH- në, por do të përdoret në vijimësi për gjithë rekrutimet e reja në Policinë e Shtetit, SHÇBA, Gardën e Republikës si dhe për diagnostifikimin periodik të të gjithë personave që shërbejnë në institucionet e sigurisë publike. Do të doja ta filloja nga vetja ime në qoftë se do të më diagnostifikoni", tha Lleshaj. Ky i fundit shtoi se certifikimi i specialistëve të rinj për poligrafin është një hap i madh për ecurinë e reformës. "Përmes poligrafit ne shtojmë një kapacitet teknik të rëndësishëm në ndihmë të vendimmarrjes për pranimin e anëtarëve të rinj në BKH dhe të institucioneve të tjera të sigurisë. Përfshirja e teknologjisë së sofistikuar në morinë e verifikimeve dhe kontrolleve, që zbatohet për përzgjedhjen e anëtarëve të rinj të BKH- së, është shenjë e kujdesit të madh që i kushtohet këtij procesi dhe përpjekje për të rritur në maksimume të panjohura më parë nivelin e objektivitetit në të", tha Lleshaj.