Meta me delegacionin e KiE: 30 qershori cenoi demokracinë
"Kushtet e Bundestagut janë pasqyra e problemeve të vendit"
Presidenti Ilir Meta priti dje në një takim delegacionin e nivelit të lartë të Kongresit të Autoriteteve Lokale dhe Rajonale të Këshillit të Europës.
Zyrtarët europianë, që zhvilluan një sërë takimesh në Tiranë, ishin me mision faktmbledhës në vendin tonë, si vijim i angazhimit të tyre për vëzhgimin e situatës në politike në Shqipëri. Një nga temat e trajtuara në takimin e tyre me Presidentin ishin edhe zgjedhjet e 30 qershorit, që nuk u pranuan nga Meta, por edhe që nuk u vëzhguan nga kjo organizatë. "Votimet njëpartiake të 30 qershorit nuk i dhanë zgjidhje krizës, por cenuan rëndë edhe demokracinë vendore, duke e zhytur më shumë vendin në rrugën e paligjshmërisë dhe kapjes së shtetit", theksoi ndër të tjera Presidenti Meta gjatë takimit. Kreu i Shtetit vlerësoi rolin e Kongresit si garant i parimeve të Kartës Europiane për vetëqeverisjen vendore dhe angazhimin e tij për monitorimin serioz të situatës në Shqipëri. Meta theksoi se Shqipëria ndodhet në një krizë sui generis përfaqësimi dhe në çekuilibër të plotë të mekanizmave të kontrollit dhe të balancës. Ai, gjithashtu, u ndal edhe në disa ligje të miratuara nga Kuvendi, të cilat, sipas tij, cenojnë autonominë vendore dhe disa parime bazë të Kartës Europiane, që presin të shqyrtohen nga Gjykata Kushtetuese, e cila ende nuk është funksionale. Në postimin në rrjetet sociale që shoqëron videon e këtij takimi, Meta shkruan se kushtet e Bundestagut pasqyrojnë problemet reale të Shqipërisë dhe se janë harta më e sigurt për rrugën europiane që duhet të ndjekë pa vonesë Shqipëria. "Një takim i frytshëm me delegacionin e nivelit të lartë të Kongresit të Autoriteteve Lokale dhe Rajonale të Këshillit të Europës. Vlerësova angazhimin e tyre për monitorimin serioz të situatës në Shqipëri, duke theksuar se vendi ndodhet në një krizë sui generis përfaqësimi, dhe në çekuilibër të plotë të mekanizmave të kontrollit dhe balancës. Votimet njëpartiake të 30 qershorit nuk i dhanë zgjidhje krizës, por cenuan rëndë edhe demokracinë vendore, duke e zhytur më shumë vendin në rrugën e paligjshmërisë dhe kapjes së shtetit. Kushtet e Bundestagut janë pasqyra më e qartë e problemeve serioze, me të cilat përballet vendi, por edhe harta më e sigurt për rrugën europiane që duhet të ndjekë pa vonesë Shqipëria", shkroi Meta në postimin e tij. Më tej, Presidenti theksoi se është jetike për të ardhmen e qytetarëve shqiptarë që situatës së tensionuar politike t'i jepet një zgjidhje tërësore, duke u kthyer legjitimitetin e munguar institucioneve përmes votës së lirë të qytetarëve. Kongresi i Autoriteteve
Lokale dhe Rajonale të Këshillit të Europës ishte në Tiranë me një delegacion të udhëhequr nga Presidenti Anders Knape, me presidentët e dy dhomave, të Autoriteteve Lokale, Xavier Cadore, ai i Rajoneve, Gunn Marit Helgesen, si dhe me Sekretarin e Përgjithshëm, Andreas Kiefer.