Basha: Dalja nga kriza kalon përmes votës së lirë

Kryetari i Partisë Demokratike, Lulzim Basha, u takua dje me delegacionin nga Kongresi i Autoriteteve Lokale të Këshillit të Europës. Përgjatë këtij takimi, Basha thotë se u shprehu atyre shqetësimin se korrupsioni dhe krimi i organizuar janë duke e bërë jetën më të vështirë dhe po nxisin largimin e shqiptarëve. Kreu i PD shkroi se nga delegacioni i KiE mori mbështetje për të dalë nga kriza duke filluar me rritjen e rolit të qytetarëve dhe garantimin e votës së lirë. "Gjatë takimit me Presidentin e Kongresit të Autoriteteve Lokale të Këshillit të Europës, Z. Anders Knape, Sekretarin e Përgjithshëm, Andreas Kiefer, Presidenten e Dhomës së Rajoneve, znj. Ms Gunn Marit HELGESEN, Presidentin e Dhomës së Autoriteteve Lokale, z. Xavier CADORET, dhe delegacionin që i shoqëronte, u shpreha mirënjohjen për vëmendjen që ky institucion ka treguar përherë ndaj vendit tonë. Shqipëria, e cila ndodhet në një krizë të thellë politike dhe ekonomike, ku korrupsioni e krimi i lidhur me politikën po gërryen themelet e shoqërisë dhe shqiptarët po largohen çdo ditë, e ka jetike ndihmën dhe mbështetjen e miqve dhe partnerëve tanë. Rruga për daljen nga kriza kalon nga zbatimi i standardeve demokratike europiane, forcimi i rolit të qytetarëve që nis me garantimin e votës, duke u dhënë mundësi atyre, që të lirë nga diktati i krimit dhe paratë e korrupsionit, të vendosin për qeverinë e tyre vendore dhe qendrore sa më shpejt", shkroi Basha në rrjetet sociale.