Hajdari: Partitë janë kthyer në grupe miliarderësh
Balla: Korrupsioni në shoqëritë demokratike luftohet nga gjyqësori
Në kuadër të Javës së Integritetit, Këshilli Kombëtar i Integrimit Europian zhvilloi një takim lidhur me ecurinë e luftës kundër korrupsionit dhe zbatimin e rekomandimeve të Komisionit Europian në raportin e vitit 2019 për Shqipërinë. Të pranishëm në këtë takim për të raportuar në lidhje me luftën ndaj korrupsionit në dikasteret e tyre ishin edhe ministret, Etilda Gjonaj dhe Anila Denaj. Por kryetarja e këtij Këshilli në fjalën e saj foli me tone shumë të ashpra për nivelin e korrupsionit në vend, duke bërë si fajtorë kryesorë politikanët e këtyre 30 viteve, që sipas saj kanë varfëruar Shqipërinë, duke u bërë vetë milionerë. Duke iu referuar raportit më të fundit të “Transparency International”, Hajdari tha se korrupsioni po e gërryen Shqipërinë. “Partitë politike në vend janë kthyer në një grup miliarderësh, të cilët pa lidhjet e tyre me krimin e organizuar nuk mund të mbijetojnë pa njëritjetrin. Nëse nuk arrijmë të luftojmë korrupsionin brenda politikës, nuk do e fitojmë betejën me këtë fenomen. Sekuestrimi pasurive duhet të fillojë me atë klasë politike, që kanë shfrytëzuar pozicionin e pushtetit për t’u pasuruar dhe për të forcuar pozitat e tyre e për të varfëruar pjesën tjetër të shqiptarëve. Korrupsioni është një nga plagët më të thella të shoqërisë sonë, e cila prek çdo aspekt të jetës së shqiptarëve”, tha Hajdari. Ndërsa nënkryetari i këtij Këshilli, Taulant Balla, nënvizoi nevojën e thellimit të reformave në kuadër të përmbushjes së kushteve që vijnë nga Bundestagu dhe KE. “Beteja jonë kundër korrupsionit vazhdon. Korrupsionin në shoqëritë demokratike s’e lufton dot askush më shumë se gjyqësori. Për shkak të kësaj rëndësie, Reforma në Drejtësi është mbështetur që në hapat e saj të parë nga shumica jonë e qeverisë. Nuk ka pasur asnjë dyshim që maxhoranca qeverisëse e drejtuar nga Edi Rama ka ekuivokë apo tërheqje për të çuar para Reformën në Drejtësi. Dua të nënvizoj se hapat e ndërmarrë për të luftuar korrupsionin kanë qenë të vazhdueshëm. Ne si qeverisje e majtë mund të kritikohemi për shumë gjëra, por jo që nuk luftuam korrupsionin. Rekomandimi i fundit i lënë në 2019- ën ishte që përpjekjet duhet të vazhdojnë për luftimin, konfiskimin e pasurive të vëna përmes përfshirjes në organizata kriminale. Ne atë po bëjmë në këto ditë të para të këtij viti. Opozita është kundër kësaj strategjie, kundër KÇK. Korrupsioni shpesh ushqehet nga paratë e krimit dhe konfiskimi i pasurive të tilla do të shërbejë në frenimin e tij. Korrupsioni duhet të luftohet nga të gjithë”, tha Taulant Balla. Ndërsa ministrja e Drejtësisë, Gjonaj, theksoi në fjalën e saj se ka një rritje të perceptimit të qytetarëve për luftën e qeverisë kundër korrupsionit. “Edhe situata politike që u kalua vitin e shkuar pas bojkotit të opozitës dhe protestave të shumta ndikojnë në një rritje të perceptimit të korrupsionit. Por duhet theksuar se perceptimi i qytetarëve për masat që ka marrë qeveria në luftën kundër korrupsionit është rritur dhe ky është një aspekt shumë i rëndësishëm”, tha Gjonaj.