Skuqje fyti dhe temperaturë e lartë, vdes i riu në Përrenjas
Familjarët nuk pranojnë autopsinë: Vdiq se pati temperaturë të lartë gjatë natës
Një djalë 28- vjeçar ka humbur jetën orët e para të mëngjesit të djeshëm, në rrethana të paqarta.
Viktima është identifikuar si shtetasi Besnik Kokonozi, ndërsa ai mësohet se ka kaluar temperaturë të lartë dy ditë më parë. Shkak për këtë dyshohet se janë bërë bajamet, të cilat i kanë shfaqur komplikacione mjaft të rënduara mbrëmjen e së dielës. Këto komplikacione dyshohet se janë bërë shkak për humbjen e jetës së të riut. Ndërkohë, familjarët e të riut janë shprehur pas ngjarjes se djali i tyre ka pasur temperaturë të lartë nga bajamet dhe nuk kanë pranuar të bëjnë autopsinë, pasi pranojnë që vdekja ka ardhur për shkaqe natyrale dhe nuk kanë dyshime të tjera.
VIZITA NË SPITAL
Tri ditë më parë, sipas informacioneve, mësohet se 28vjeçari kishte shkuar në spital, për shkak të temperaturës së lartë që kishte pasur. Aty ai mori mjekimin dhe u kthye në shtëpi. Rreth orës 03: 00 të mëngjesit të kësaj të marte, ai ka shfaqur sërish komplikacione. Fillimisht, mjekët dyshuan se bëhej fjalë për grip, megjithatë nuk është bërë ekspertiza për të nxjerrë shkakun e vërtetë se përse i riu ndërroi jetë. Mësohet se ai kishte probleme me bajamet, gjë e cila dyshohet se i ka rënduar komplikacionet shëndetësore.
PËRKEQËSIMI
Orët e para të mëngjesit të ditës së martë, familjarët e 28vjeçarit kanë telefonuar për ndihmë në Spitalin e Përrenjasit. Ata mësohet se kanë kërkuar t'u vihet në dispozicion një mjet ambulancë, pasi djali i tyre ishte në gjendje të rënduar shëndetësore. Menjëherë, për në banesën e të riut është dërguar ambulanca, por kur ajo ka arritur ka qenë mjaft vonë, pasi Besnik Kokonozi kishte ndërruar jetë. Megjithatë, trupi i tij është transportuar për në spital, ku i është bërë këqyrja paraprake. Më tej, familjarët e viktimës nuk kanë pranuar t'i bëhet ekspertiza dhe të mësohej shkaku i vdekjes. Ata janë shprehur se djali i tyre ishte sëmurë me bajame dhe kishte pasur temperaturë të lartë.