BE refuzon planin e Trump për Lindjen e Mesme: Duhen negociata mes palëve
Bashkimi Europian e ka refuzuar të martën planin e paqes së Presidentit amerikan Donald Trump për Lindjen e Mesme, duke marrë një përgjigje të zemëruar nga Izraeli. Plani u bë publik nga Trump javën e kaluar, për krah me Kryeministrin izraelit, Benjamin Netanyahu, në Shtëpinë e Bardhë. Trump tha se nën vizionin e tij, Jerusalemi “do të mbetet kryeqyteti i pandarë i Izraelit, shumë i rëndësishëm, kryeqytet i pandarë” dhe se plani “do të dyfishojë territorin palestinez dhe do të sigurojë një kryeqytet palestinez në Jerusalemin Lindor, ku Amerika me krenari do të hapë një ambasadë”.
Presidenti Trump e quajti planin e tij një mundësi historike për palestinezët, që “mund të jetë mundësia e fundit që ata do të kenë ndonjëherë”. Por plani do t’i jepte Izraelit pjesën më të madhe të asaj që kërkoi gjatë dekadave të konfliktit, përfshirë gati të gjithë tokën palestineze mbi të cilën ka ndërtuar vendbanime, që
OKB- ja i konsideron ilegale. BE, e cila shpesh kërkon kohë për t’iu përgjigjur zhvillimeve ndërkombëtare për shkak të një nevoje për unanimitet midis 27 anëtarëve të saj, i bëri publike përfundimet të martën në një deklaratë të kryediplomatit Josep Borell. Ai tha se plani i Trump largohet nga “parametrat e rënë dakord ndërkombëtarisht”. “Për të ndërtuar një paqe të drejtë dhe të qëndrueshme, çështjet e statusit përfundimtar të pazgjidhura duhet të vendosen përmes negociatave të drejtpërdrejta midis të dyja palëve”, tha Borell, duke përmendur çështjet e kufijve. Borell theksoi se hapat e Izraelit për të aneksuar territorin palestinez, “nëse zbatohen, nuk mund të kalojnë të padiskutuara”. Izraeli u kundërpërgjigj ashpër. “Fakti që përfaqësuesi i lartë i BE- së, Josep Borell, zgjodhi të përdorë gjuhë kërcënuese ndaj Izraelit, menjëherë pasi ai mori detyrën dhe vetëm disa orë pas takimeve të tij në Iran, është për keqardhje dhe të themi të paktën, i çuditshëm”, tha zëdhënësi i Ministrisë së Jashtme izraelite, Lior Haiat, duke shtuar se, “Ndjekja e politikave të tilla është mënyra më e mirë për të siguruar që roli i BE- së në çdo proces të minimizohet”.