OSMANI KËRKON NDIHMËN E AUSTRISË PËR LIBERALIZIMIN E VIZAVE
Vjosa Osmani është uruar nga ambasadori i Austrisë në Kosovë, Christoph Weidinger, për detyrën e saj si kryeparlamentare, në emër të kryetarit të Asamblesë Kombëtare të Austrisë, Wolfgang Sobotka. Weidinger nënvizoi miqësinë e vazhdueshme të Austrisë dhe e siguroi Osmanin për përkrahjen e mëtejme të shtetit të tij për Kosovën. Ambasadori austriak e siguroi Osmanin se qeveria e re e Austrisë do të vazhdojë ta përkrahë edhe më tej Kosovën, ndërsa Osmani kërkoi që Austria të ndikojë në liberalizimin e vizave, pasi “vendi tashmë i ka plotësuar kriteret për liberalizim, por qytetarët tanë po mbahen ende të izoluar”. Theks të veçantë i kushtuan bashkëpunimit në fushën e diplomacisë parlamentare. Osmani e siguroi Waidingerin se si përfaqësuese e popullit, ajo do të ndikojë që Kuvendi t’i mbajë dyert të hapura për qytetarët dhe se do të jetë garantues i mbrojtjes së lirive dhe i të drejtave të tyre.