Kurti do ta bëjë vizitën e parë shtetërore në Shqipëri
Takim kabineti, ministrave u kërkohet t’u afrohen qytetarëve
Kryeministri i ri i Kosovës, Albin Kurti, e ka nisur rrugën drejt Kryeministrisë nën himnin e Kosovës, valëvitjen e flamurit shtetëror të Kosovës ( të cilin më parë në Kuvend e ka zëvendësuar gjithnjë me flamurin kombëtar) dhe me nderime ushtarake.
Kurti u shoqërua drejt zyrës së tij nga ish- zv. kryeministri Behgjet Pacolli, i cili i ka dorëzuar zyrtarisht mandatin, në mungesë të ishKryeministrit Ramush Haradinaj, i cili ndodhet në SHBA. Pak minuta pasi pranoi detyrën, Kurti, ka mbledhur kabinetin e ri, duke u kërkuar ministrave të jenë sa më afër qytetarëve. Ai ka thënë se në ekzekutiv nuk do të jenë të ndarë në bazë të partive. Pas takimit me ambasadorin shqiptar, Qemal Minxhozi, u njoftua se Kurti, vizitën e parë shtetërore do ta bëjë në Shqipëri. Kryeministri Kurti ka paralajmëruar një mbledhje të re me vartësit e tij, në të cilën do të diskutojë planprogramin qeverisës. Qeveria e Kurtit me 15 ministra, 33 zëvendësministra dhe dy zëvendëskryeministra u votua nga 66 deputetë në seancën e së hënës, nga 120 sa janë gjithsej. Opozita nuk qëndroi në sallë kur u votua qeveria. Më pas, në ditën e tij të parë si Kryeministër, Albin Kurti ka marrë pjesë në akademinë përkujtimore kushtuar 20- vjetorit të vrasjes së 10 civilëve shqiptarë në Mitrovicë. “Nën patronatin tim si kryetar i komunës dhe në bashkëpunim me KMDLNJ- në, u mbajt akademia përkujtimore kushtuar 20- vjetorit të masakrës së 3 dhe 4 shkurtit të vitit 2000, ku u vranë 10 shqiptarë, mes të cilëve edhe fëmijë, gra e pleq. Falënderoj Kryeministrin e Republikës së Kosovës, z. Albin Kurti, për pjesëmarrje në këtë ngjarje shumë të rëndësishme përkujtimore, i cili tregoi se në ditën e parë të punës së tij gjen kohë ta vizitojë Mitrovicën”, ka shkruar kryetari i Mitrovicës, Agim Bahtiri, duke shtuar se “Shqiptarët e dëbuar me dhunë, edhe sot e kësaj dite jetojnë në kushte të vështira, edhe pse ne si komunë po bëjmë përpjekje të vazhdueshme për t’u ndihmuar atyre. Me këtë rast, kërkova nga kryeministri z. Albin Kurti që të sigurohet një fond nga qeveria për ndërtimin e shtëpive të shqiptarëve në veri, të cilët janë shpërngulur nga vendi i tyre me dhunë”. Me 3 dhe 4 shkurt të vitit 2000, serbët larguan nga shtëpitë e tyre shqiptarët nga qyteti i Mitrovicës, që atë kohë ende nuk ishte i ndarë. Për pjesën veriore të Kosovës, në atë kohë përkujdesej KFOR- i francez. Kryeministri Kurti është zotuar se do ta padisë Serbinë në gjykatat ndërkombëtare për krime lufte dhe krime kundër njerëzimit gjatë luftës në Kosovë.