Basha pret ambasadoren e re të SHBA e kreun e PE: PD, e angazhuar për reformat

Basha e Kim

Në ditën e dytë të vizitës së tij në Shqipëri, Presidenti i Parlamentit Europian, David Sassoli, zhvilloi një takim për disa minuta me opozitën e bashkuar në selinë blu. Kryetari i opozitës, Lulzim Basha, përmes një postimi në "Facebook", pas bashkëbisedimit bëri me dije se ka marrë konfirmimin e Presidentit të PE- së për të mbështetur integrimin e Shqipërisë në BE. "Partia Demokratike dhe opozita e bashkuar po bën gjithçka që hapja e negociatave me Bashkimin Europian të bëhet realitet sa më parë. I lumtur të takoja mikun e Shqipërisë, Presidentin e Parlamentit Europian, z. David Sassoli, dhe të merrja prej tij konfirmimin se personalisht dhe institucionalisht do të jetë një mbështetje e fuqishme dhe e vazhdueshme për rrugën europiane të Shqipërisë dhe përparimin demokratik të vendit tonë", sqaroi kreu i opozitës në "Facebook". Ndërkohë nga ana tij, Basha në emër të gjithë opozitës së bashkuar iu zotua se do bëjë angazhimet e saj sa i përket plotësimit të kushteve për çeljen e negociatave. "I konfirmova se Partia Demokratike dhe opozita e bashkuar po bën gjithçka, që aspirata e qytetarëve shqiptarë për hapjen e negociatave me Bashkimin Europian të bëhet realitet sa më parë. Bashkimi Europian dhe respektimi i vlerave europiane është e ardhmja e vetme e Shqipërisë, pavarësisht krizës që vendi po kalon. Mirënjohje Presidentit Sassoli dhe Parlamentit Europian për mesazhin shpresëdhënës, se populli shqiptar ka pasur dhe do të ketë gjithmonë mbështetjen e Europës", shtoi Basha. Kujtojmë që në dokumentin e miratuar nga Bundestagu gjerman në tetor të vitit të kaluar, pika e vetme në të cilën angazhohej opozita ishte miratimi i Kodit të ri Zgjedhor. Bashkëpunimi mes maxhorancës dhe opozitës në tetor të vitit të kaluar dështoi, po ashtu edhe çelja e negociatave. Në mars pritet që të diskutohet sërish nëse Shqipërisë dhe Maqedonisë së Veriut do t'u hapet drita jeshile për të filluar bisedimet për përshtatjen e ligjeve me Bashkimin Europian dhe më pas anëtarësimin e dy vendeve.