“Maxhoranca po e kthen Kushtetuesen në organizatë partie”, Meta flet edhe për KÇK: Krimi nuk luftohet me fushata
PRESIDENTI TAKON EDHE PALMER: ZBATIMI I REFORMES, KUSHT PER INTEGRIMIN NE BE
Presidenti Meta akuzoi dje maxhorancën se po kërkon ta kthejë Gjykatën Kushtetuese në një organizatë partie.
Në një intervistë për “Zërin e Amerikës” me gazetarin Arben Xhixho, kreu i shtetit nuk e miratoi paketën anti- KÇK të qeverisë, duke u shprehur se ligjet dhe institucionet kanë qenë aty, ndërsa qeverinë nuk e ka penguar askush që të ngrinte task forca për të zbatuar ligjin. Ai tha dje se Shqipëria i kishte të gjitha ligjet e duhura, duke shtuar se kur bëhen ndërhyrje në legjislacion, ato duhet të jenë të mirëmenduara, që të mos krijojnë mbivendosje të karakterit ligjor.
Zoti President, lufta ndaj krimit të organizuar është një tjetër çështje thelbësore për Shqipërinë. Ditët e fundit, qeveria ka ndërmarrë nismën e re, Operacioni Forca e Ligjit. Si e vlerësoni ju këtë nismë të re?
Pa dyshim që lufta kundër krimit të organizuar është një kërkesë e vjetër, pra, nuk është një kërkesë e re. Ajo çka është imperativi për të dhënë rezultate të prekshme dhe të besueshme, unë mendoj se legjislacioni ka qenë i plotë në të gjitha drejtimet dhe duhet të jemi mjaft të kujdesshëm, që të kemi në konsideratë se kjo nuk është luftë që zhvillohet me fushata, por zhvillohet çdo ditë duke forcuar kulturën e shtetit ligjor, respektimin e Kushtetutës, respektimin e ligjit dhe të ndëshkueshmërisë të të gjithë atyre që rezultojnë të implikuar, jo vetëm me këto fenomene, por edhe në të gjitha strukturat shtetërore në mbrojtje të këtyre fenomeneve.
Pra, nëse ju kuptova drejt, mendimi juaj është që ky akt normativ, ky ligj, nuk ishte i nevojshëm?
Mendimi im ishte se i gjithë legjislacioni ka qenë aty, të gjitha institucionet kanë qenë aty. Askush nuk e pengon qeverinë të ngrejë task- forca në mënyrë të vazhdueshme, por kur bëhen ndërhyrje në legjislacion, këto duhet të jenë mjaft të mirëmenduara, mjaft transparente, të besueshme dhe të mos krijojnë kontestime apo mbivendosje të karakterit ligjor apo dhe të karakterit institucional, sepse në një plan afatgjatë këto nuk i shërbejnë forcimit të sundimit të ligjit.
Në kuadër të Reformës në Drejtësi, një nga institucionet e reja më të rëndësishme që i mungon Shqipërisë, është pikërisht Gjykata Kushtetuese dhe emërimet për anëtarët e saj çuan në një përplasje të re dhe të thellë, madje midis jush dhe shumicës socialiste. Kjo e fundit pritet të miratojë javën e ardhshme një ndryshim ligji për organizimin e kësaj Gjykate, sipas së cilës nëse anëtari nuk thirret për të bërë betimit nga ana e Presidentit, ai mund ta bëjë këtë në një formë tjetër, në formë të shkruar dhe t’ia nisë Presidentit. Cili është mendimi juaj për këtë nismë?
Më duhet të them se është për të ardhur keq që ndërmerren nisma të tilla, të cilat tregojnë mungesë të respektit për shtetin ligjor dhe vetë Kushtetutën që e kemi miratuar me 140 vota. Për sa u takon institucioneve të reja të drejtësisë, është një kokëfortësi, e cila nuk na ndihmon të rrisim besueshmërinë brenda dhe jashtë vendit se po zbatojmë në mënyrë të përgjegjshme Reformën në Drejtësi, aq më tepër për institucionin më të rëndësishëm të shtetit dhe drejtësisë në vend, që është Gjykata Kushtetuese. Të bësh një ligj mbi Kushtetutën nuk është asgjë tjetër, përveçse, në rastin konkret, një përpjekje për të shndërruar Gjykatën Kushtetuese në një organizatë partie dhe për të hedhur në erë besueshmërinë e gjithë sistemit të drejtësisë. Është Presidenti i Republikës, edhe në pozitën e mëparshme si Kryetar i Kuvendit, për përgjegjësitë që ka pasur për çështjet e krijimit të Komisionit të Emërimeve në Drejtësi dhe në vazhdimësi, i cili gjithmonë ka bërë më të mirën që Shqipëria, asnjë orë, asnjë ditë, të mos ngelej pa Gjykatë Kushtetuese funksionale. Dhe në rastin e fundit, është Presidenti që ka bërë të gjitha përpjekjet për të mos e cenuar integritetin e krijimit të Gjykatës Kushtetuese, duke i kërkuar edhe Komisionit të Emërimeve në Drejtësi, që është një organ administrativ në ndihmë të Presidentit, të Kuvendit dhe të Gjykatës së Lartë për zgjedhjen, sipas Kushtetutës së Gjykatës Kushtetuese, por edhe Kuvendit në mënyrë të dokumentuar, të vazhdueshme që të respektojnë Kushtetutën. Kushtetuta e ka të shkruar germë për germë, përveç frymës së saj, radhën kushtetuese të balancuar se si veprohet në këtë rast dhe Presidenti ka respektuar me besnikëri të plotë Kushtetutën dhe ka kërkuar në mënyrë të dokumentuar, të përsëritur, bashkëpunimin e Kuvendit. Është e qartë e gjithë përpjekja e maxhorancës, për të ardhur keq, për të kapur edhe këtë institucion të fundit të pakapur prej saj për qëllime afatshkurtra politike, duke hedhur në erë gjithë besueshmërinë e këtyre proceseve reformuese.
Pra, pikërisht kjo çështje, Gjykata Kushtetuese, ka shkuar tashmë në Komisionin e Venecias. Edhe ju i jeni drejtuar Komisionit të Venecias, edhe maxhoranca, Parlamenti i është drejtuar Komisionit të Venecias për interpretim, mbi mënyrën sesi bëhet zgjedhja. Por, përpara se ta bëni këtë, komuniteti ndërkombëtar, përfshirë Uashingtonin, sugjeroi që të merrej mendimi i Venecias për konfliktin mbi Gjykatën Kushtetuese. Ju në atë kohë reaguat mjaft ashpër. Çfarë ndryshoi tani, që ju vetë po i drejtoheni Komisionit të Venecias?
Së pari, përfaqësues të Uashingtonit, në Tiranë dhe kudo, kanë qenë të paralajmëruar nga ana ime si President i Republikës për të gjithë problematikën para se ajo të bëhej publike dhe kanë pasur mundësinë të kontribuonin që çështja të mos shkonte në përplasje. Përkundrazi, çdo institucion, përfshirë Presidentin, Kuvendin, përfshirë edhe Komisionin e Emërimeve në Drejtësi, që është vetëm një organ administrativ, nuk është Gjykatë, të bënin detyrën e tyre. Kërkesa që të pranonte edhe Presidenti për të vënë në diskutim në Venecia aktet e tij, ishte absurde dhe e turpshme, për arsye se Presidenti ka kryer me përgjegjshmëri të plotë atë që ka shkruar vetë Komisioni i Venecias, i cili radhën e zgjedhjes së anëtarëve të Gjykatës Kushtetues e ka përcaktuar në Kushtetutë, jo ligj.
Ky është interpretimi juaj. Të tjerët e interpretojnë ndryshe. Prandaj...
Po, patjetër. Unë gjithmonë i referohem Kushtetutës. Nuk i referohem as Uashingtonit, as Brukselit, sepse nuk mund të fshihem në veprimet e mia, sepse ato janë në besnikëri të Kushtetutës.
Po, edhe pala tjetër atë pretendon...
Më fal. Jo. Pala tjetër nuk i referohet Kushtetutës. Pala tjetër vetëm thotë që kemi diskutuar me partnerët tanë, me ata.... unë s’i përdor partnerët për të justifikuar legjitimitetin e veprimeve të mia, sepse ato janë tërësisht legjitime dhe i referohen vetëm Kushtetutës së Republikës së Shqipërisë. Pra, pse i jam drejtuar Venecias? Unë i jam drejtuar Venecias, sepse Parlamenti, ndoshta edhe sot, deri në ditën që unë i jam drejtuar, nuk kishte publikuar as parashtrimin e kërkesës për çështjen e Gjykatës Kushtetuese. Madje, edhe pyetjet rrodhën nga mediat, sepse nuk janë bërë publike edhe pse është një institucion që transparencën e ka detyrim. Dhe pyetjet e Parlamentit ishin vetësugjeruese jashtë asaj që kishte ndodhur, kështu që unë isha i detyruar, jo vetëm për t’i bërë të qartë Komisionit të Venecias gjithë shkeljet kushtetuese dhe ligjore që ka bërë për fat të keq Kuvendi i Shqipërisë, por edhe për ta ndihmuar për të ballafaquar fakte dhe të vërteta.