Kuvendi apelon mbylljen e hetimeve, Balla: S’janë marrë parasysh faktet
Kuvendi i Shqipërisë apelon çështjen “CEZ”, duke i kërkuar Gjykatës së Apelit në Tiranë të kthejë për shqyrtim çështjen e mbyllur nga Gjykata e Tiranës lidhur me dosjen e “CEZ”. Shkresa është firmosur nga sekretari i përgjithshëm i Partisë Socialiste, Taulant Balla, si kryetar i komisionit hetimor për çështjen. Ish- kryetari i komisionit hetimor për këtë çështje, Taulant Balla, në një deklaratë për mediat dje, tha se Gjykata nuk ka marrë parasysh faktet. “Gjykata ka bërë një dezertacion për veprat penale, por në asnjë moment nuk ka analizuar faktet. Nga faqja 10 deri në fund, gjyqtari ka shpjeguar ç’nënkuptojnë emërtesat e veprave penale dhe termat, por jo faktet. Privatizimi i OSSH, që ka qenë objekt i komisionit hetimor, është bërë në kundërshtim të plotë me ligjin, sepse është nxjerrë për privatizim një shoqëri e sapokrijuar, e cila nuk kishte bërë një bilanc për energjinë”, tha Balla. Numri dy i PSsë, Balla, tha se dosja “CEZ” duhet të ishte transferuar te Prokuroria e Posaçme Antikorrupsion. “Për një kallëzim të këtij niveli, Prokuroria nuk duhet të kishte konkluduar në mbylljen e hetimeve. Për sa kohë që personat e akuzuar apo ata të rëndësishëm nuk janë marrë në pyetje, Prokuroria duhet domosdoshmërisht të zgjaste afatet e hetimit. Prokuroria e Tiranës duhet të kishte transferuar këtë dosje në SPAK, pasi është jashtë kompetencës së kësaj Prokurorie dhe Gjykate”, tha Balla. Kreu i Grupit të PS- së përsëriti sërish akuzën për gjyqtarin Llazër Sollaku. “Nxitimi dhe vrapimi i personave të kallëzuar, nën hetim apo të interesuar, pa dyshim, kap ca të kapësh, që është sjellja e qartë e prokurorëve dhe gjyqtarëve të korruptuar për të mbyllur një dosje të rëndë është shprehja më kuptimplotë se si në këtë vend janë shpërdoruar asetet dhe fondet publike në këto 20 e kusur vjet”, tha Balla.