“Der Spiegel”: Qeveria Kurti, e para... që nuk doli nga pazaret e bodrumeve
Revista gjermane “Der Spiegel” u ka kushtuar një shkrim analizues drejtuesve të rinj të institucioneve të Kosovës, duke vlerësuar Albin Kurtin ( Kryeministër) dhe Vjosa Osmanin ( Kryeparlamentare) për premtimin se do të ndërtojnë një shtet ligjor në Kosovë.
Në analizën e botuar të dielën, “Der Spiegel” shkruan se Kosova pa ndihma ndërkombëtare vështirë do të mbijetonte. Sipas tyre, sistemi i sundimit të ligjit ekziston vetëm në sipërfaqe dhe arsyeja për këtë, është se deri më tani kanë qeverisur ish- komandantët e korruptuar dhe klanet e tyre. “Tani kjo mund të ndryshojë: në fillim të javës postin e Kryeministrit në Prishtinë e mori Albin Kurti. Qeveria e tij është e para që nga fundi i luftës, më 1999, që gëzon legjitimitet të plotë demokratik, ajo nuk u krijua nga pazaret e bodrumeve apo nën përkrahjen e shteteve që mbrojnë Kosovën”, shkruan “Der Spiegel”. Ky është një sinjal që nuk duhet nënvlerësuar, në një rajon që pothuaj gjithkund sundojnë autokratë. BE duhet ta shohë këtë sinjal dhe në të ardhmen të marrë më seriozisht vullnetin e qytetarëve në Ballkanin Perëndimor.
Duke kujtuar biografinë politike të Kurtit si lider studentor, revista gjermane shkruan se ai ka qenë një i burgosur politik në Serbi dhe aktivist i majtë kundër establishmentit politik në Kosovë. Kurti, sipas “Der Spiegel”, konsiderohet i pakorruptuar. Edhe Vjosa Osmani paralajmëron një kthesë radikale. Ajo është kryetare e Parlamentit dhe pas kryetarit të shtetit, përfaqësuesja e dytë më e lartë e vendit. “Kosova është një demokraci e brishtë. Nuk kemi drejtësi të pavarur”, i tha ajo revistës gjermane. Osmani përshkruhet në analizë si kritike e korrupsionit të elitave dhe ngjashëm si Kurti, edhe ajo dëshiron që në Kosovë të ndërtohet një shtet ku sundon ligji. “Vendi ynë tani e tutje do të drejtohet prej njerëzve që nuk kanë probleme me ligjin”, ka deklaruar Vjosa Osmani.
Në analizë shkruhet se qeveria duhet të luftojë korrupsionin dhe nepotizmin, të pastrojë sistemin nga gjykatësit dhe prokurorët e padenjë për postet e tyre. Sipas “Der Spiegel”, BE- ja duhet të mësohet me një qeveri që do të ketë vetëbesim. Sa për parashikimet, nuk pritet normalizim i shpejtë me Serbinë. Kurti hedh poshtë shkëmbimin e territoreve, Osmani thotë se parakusht për dialog është njohja e Kosovës nga Serbia dhe trajtimi juridik i krimeve serbe të luftës. “Nuk do të ketë paqe me Serbinë pa drejtësi për dhjetëra mijëra viktima shqiptare të luftës”, citohet në shkrim kryetarja e Kuvendit të Kosovës. “BE duhet ta ketë parasysh se Presidenti serb, Aleksandar Vuçiç, mohon gjenocidin dhe duhet të ketë konsekuencat e duhura”.