Shkodra dhe Durrësi, PS i kërkon Metës datë zgjedhjesh

"Presidenti është vënë në dijeni nga institucionet përkatëse vendore në qarqet përkatëse, lidhur me vakancën e krijuar"

Në një kohë kur Partia Socialiste po bëhet gati të përmbyllë procesin e zgjedhjeve të brendshme, sekretari i përgjithshëm i saj, Taulant Balla, i është rikthyer apelit të tij ndaj Presidentit Meta që të mos humbasë kohë për të caktuar datën e zgjedhjeve në Shkodër, Durrës dhe Vorë.

Të tria këto bashki janë pa kryetar, pasi Pjetri dhe Kajmaku ishin subjekte të ligjit të dekriminalizimit, ndërsa Valbona Sako u dorëhoq pas një gafe gjatë një interviste. Duke folur për gazetarët, Balla i bëri thirrje Metës që të dekretojë sa më shpjet datën e zgjedhjeve, pasi të gjitha njoftimet sipas ligjit i ka marrë. "Presidenti ka qenë dhe mbetet në moszbatim të detyrave kushtetuese që ka. Z. President është vënë në dijeni nga institucionet përkatëse vendore, siç është prefekti i qarkut, në qarqet përkatëse, lidhur me vakancën e krijuar. Është Presidenti që duhet të zgjohet dhe respektojë Kushtetutën", u shpreh Balla. Më tej, numri dy i PS- së foli dhe për gjendjen e krijuar në PS- në e Shkodrës, duke theksuar se do të gjendet zgjidhje pas Kongresit të datës 29 shkurt. "Kam bërë një raportim në Kryesi për gjendjen e partisë në Shkodër. Shumë shpejt do të kemi edhe aty një drejtues të PS- së, që të përmbushë pritshmëritë e PSsë, por edhe të kënaqë vlerësimin e popullit të nderuar të Shkodrës. Pas 29 shkurtit do të kemi Asamblenë e re Kombëtare dhe Kryesinë e partisë. Me ndryshimet dhe me fillimin e një mandati të ri të partisë, ai do jetë momenti kur do të kemi dhe një drejtues të ri politik", u shpreh sekretari i përgjithshëm i Partisë Socialiste, Taulant Balla. Ndërsa për procesin zgjedhor në PS, kreu i Grupit Parlamentar Socialist tha se do të miratohet një axhendë e të gjitha veprimtarive politike të vitit. Balla mohoi që të jenë zgjedhjet e parakohshme në horizont, teksa shtoi se plani i këtij viti ka një ndryshim, pasi përmbyllet në qershorin e 2021, që përkon dhe me datën kur do duhet të organizohen zgjedhjet e përgjithshme. "Kongresi është institucioni më i lartë i partisë, Kongresi përcakton të gjithë rregullat, funksionalitet dhe detyrat e çdo institucioni. Për asnjë institucion të partisë nuk ndryshon mënyra e zgjedhjes, por duke vlerësuar që statuti i partisë është si Kushtetuta për një vend, në këtë frymë kemi përshtatur edhe këto ndryshime të tjera që do t'i paraqiten përfaqësisë së Kongresit, i cili është institucioni që ka të drejtën formale dhe institucionale. Në Kongres, ne do të miratojmë edhe një axhendë të aktivitetit politik të Partisë Socialiste. Biem të gjithë dakord që gjithmonë në këto 29 vite, kongreset e Partisë Socialiste të Shqipërisë kanë qenë momente të rëndësishme në jetën politike të vendit. Në axhendën politike që do të miratojmë këtë vit do të ketë një lloj ndryshimi, sepse axhenda politike nuk përmbyllet më 31.12.2020, por më 30 qershor të vitit 2021, afat brenda të cilit ne planifikojmë, që të zhvillohen dhe zgjedhjet e përgjithshme parlamentare. Kështu që, edhe kjo pyetja juaj e kahershme për zgjedhje të parakohshme merr një përgjigje përfundimtare dhe unë do të bie rehat për këtë lloj pyetjeje për të paktën 13 muaj", tha Balla.