Korrupsioni dhe taksat largojnë investimet e SHBA
Enio Jaço: Shqipëria jokonkurrente, Maqedonia e Veriut ka dyfishin e shkëmbimit tregtar me SHBA
Presidenti i Dhomës Amerikane të Tregtisë, Enio Jaço, i bëri thirrje dje qeverisë shqiptare që të përmirësojë klimën e investimeve.
Në fjalën e tij, në raportin vjetor të punës së Dhomës Amerikane të Tregtisë, Jaço tha se aktualisht ekonomia shqiptare po përballet me tkurrjen e investimeve nga 2 projektet më të mëdha infrastrukturore: TAP dhe Devoll, si dhe me pasojat e tërmetit, ndaj duhet të bëjë shumë për të tërhequr investime të huaja. “Duhet reformë e thellë për klimën e investimeve, për të përmirësuar situatën. Shqipëria ka potencial, është vend i favorshëm gjeopolitik, është vend i NATO- s, ofron siguri, ka marrëdhënie me SHBA, kemi popullsi të re, kemi fuqi punëtore të re, më të mirën në rajon. Ne kemi kushte unike për ta bërë Shqipërinë lider në rajon. Prandaj duhet përmirësuar klima e biznesit”, tha Jaço. Pavarësisht kapaciteteve që ka Shqipëria, niveli i shkëmbimit tregtar mes Shqipërisë dhe SHBA- së, sipas Presidentit të Dhomës së Tregtisë, janë ende shumë të ulëta. Ai bëri një krahasim me Maqedoninë e Veriut, e cila edhe pse me më pak potenciale, ka dyfishin e shkëmbimit tregtar. “Shqipëria me SHBA- në ka një bilanc tregtar 100 milionë dollarë, shumë nivel i ulët. Ndërsa me Maqedoninë e Veriut, bilanci është 230 milionë dollarë shumë më i lartë, edhe pse është një ekonomi më e vogël se Shqipëria. Ballkani Perëndimor po bëhet rajon interesant për investitorët e mëdhenj. Si performon Shqipëria me vendet e rajonit? Kjo është pyetja më e madhe. Shqipëria renditet e 82ta në raportin e Doing Bisness dhe të gjithë fqinjët janë më lart se Shqipëria për biznes. Mali i Zi, në vendin e 17”, vijoi Jaço. MOSRESPEKTIMI I
LIGJEVE Një nga shqetësimet kryesore që raportojnë bizneset e anëtarësuara në Dhomën Amerikane të Tregtisë është mosrespektimi i ligjit dhe ndryshimet e shpeshta të paketës fiskale. Akoma më shqetësuese, sipas kryetarit Jaço, është mosinformimi në kohë apo moskonsultimi i ndryshimeve të paketës fiskale me grupet e interesit. “Ligji për konsultimin publik nuk respektohet. Institucionet e kanë detyrim ligjor që për çdo ligj të njoftojnë 20 ditë më parë. Por nga analizat tona, nuk është respektuar. Asnjëherë nuk është përmbushur niveli minimal dhe nuk na ka lënë kohë të japim mendimin e duhur për shumë ligje. Ky mosrespektim ka efekte negative në besimin e biznesit. Ministria për Mbrojtjen e Sipërmarrjes të marrë një rol më të madh për këtë. Të gjithë e kuptojmë rëndësinë e investimeve, pasi krijojnë mundësi punësimi, rrisin konkurrencën sjellin të ardhura. Shqipëria tani ka më shumë nevojë për projekte, pasi TAP dhe Devoll po mbaron e duhen zëvendësuar për të mbajtur ekonominë aty ku ka qenë. Gjatë vitit 2020, do të ndikohen shpenzimet e konsumatorit, për shkak të të ardhurave të ulëta në 3- mujorin e fundit”, vijoi Presidenti i Dhomës Amerikane të Tregtisë. Ai tregoi rastin e një kompanie amerikane e cila po ndeshet me probleme për të ekzekutuar një kontratë të marrë, ndërsa paralajmëroi se do të publikojë dhe emra e shifra investitorësh të larguar. PARALAJMËRIMI Që në fillim të fjalës së tij, drejtuesi i Dhomës Amerikane të Tregtisë përmendi numrin e bizneseve që janë anëtarësuar në të dhe rëndësinë që kanë ato biznese në tregun shqiptar. Sipas Jaços, aktiviteti ekonomik i të gjitha kompanive që përfaqësohen nga Dhoma e Tregtisë zënë më shumë se 22% të ekonomisë shqiptare. “Ne përfaqësohemi nga 222 kompani, kemi pasur një rritje të anëtarësisë gjatë vitit 2019 me 17%. Kompanitë anëtare të AmCham përfaqësojnë të ardhura të përbashkëta prej 2.8 miliardë dollarësh, ose e thënë ndryshe, pak më shumë se 22% e ekonomisë shqiptare. Ne jemi të ndërgjegjshëm për peshën e AmCham, por edhe rolin dhe përgjegjësinë që kemi për klimën e biznesit në Shqipëri dhe përgjegjësinë për përmirësimin e kësaj klime”, vijoi Jaço.