Kongresi i PS, gati statuti dhe rregulloret e reja të socialistëve
Kongresi i 29 shkurtit, përveç zgjedhjes së organeve drejtuese të Partisë Socialiste, si Asambleja Kombëtare, që do të vijojë me Kryesinë dhe Sekretariatin e ri, do të miratojë dhe ndryshimet në statutin dhe rregulloret e kësaj partie. Përveç ndryshimeve që do të pësojë statuti, sa i takon mënyrës së drejtimit të organizatave socialiste me dy bashkëkryetarë, burrë dhe grua, do të bëhet dhe një strukturim i plotë i tij. Shumë nga përcaktimet e statutit që kanë të bëjnë me funksionimin e institucioneve brenda partisë, do të hiqen dhe do t'u atashohen rregulloreve të tyre, si rregulloret e Asamblesë Kombëtare dhe atyre të bashkive, apo rregullores së Kryesisë dhe Grupit Parlamentar. Statuti do të mbetet si një libër rregullash në parim, pa pasur detajime. "Lidhur me statutin e partisë, dua t'ju them se Partia Socialiste e Shqipërisë është një parti shumë demokratike dhe ka një libër të rëndësishëm rregullash, që garantojnë funksionalitetin dhe një organizim që e ka bërë këtë parti të jetë fituese përgjatë shumë proceseve zgjedhore të zhvilluara në vend. Synimi ynë ka qenë të bëjmë disa rregullime për t'i reflektuar ato në librin e rregullave dhe Kodin Zgjedhor të partisë, model që e kemi konsultuar me shumë parti fituese edhe në Europë", u shpreh Balla. Sekretari i përgjithshëm në PS, Taulant Balla, tha dje se mbledhja e Kryesisë ka analizuar dhe përfaqësimin gjinor në organet e reja të saj. "Ne jemi partia e parë në vend që kemi përqafuar idenë e bashkëdrejtimit mes grave dhe burrave, vajzave dhe djemve, në drejtimin e organizatave socialiste në të gjithë territorin, për të garantuar një përfaqësim të barabartë mes dy gjinive. Jemi në fazën që paraprin Kongresin, po zhvillojmë një proces tejet transparent dhe demokratik në përzgjedhjen e kandidatëve për Asamblenë e re Kombëtare të partisë, e cila do të zgjidhet nga Kongresi. Edhe këtu do garantohen tërësisht ekuilibrat dhe barazia gjinore. Pas Asamblesë Kombëtare do të zgjidhet edhe struktura e re drejtuese e partisë, që është Kryesia dhe Sekretariati", tha Balla. Gjatë fundjavës, delegatët e Kongresit të PS kanë bërë përzgjedhjen e kandidaturave për anëtarë të Asamblesë Kombëtare, të cilët do të votohen në Kongres më 29 shkurt. "Propozimet e kandidaturave për anëtarë të Asamblesë Kombëtare bëhen nga delegatët e Kongresit të PS- së, duke respektuar parimet e barazisë gjinore, meritokracisë profesionale dhe politike, integritetit moral e ligjor, si dhe me vëmendje të veçantë promovimi i të rinjve, si qasje e përhershme e Partisë Socialiste", shkruante Balla në një postim të tij në rrjetet sociale.