Çmimet e shtëpive e tokave, ja si do të llogaritet tatimi
Për rivlerësimin e shtëpive, bazë janë çmimet minimale fiskale
Çmimet minimale fiskale që aplikohen për zonën kadastrale në të cilën ndodhet banesa, do të shërbejnë si bazë për rivlerësimin.
Kjo vlen për shtëpitë, pasi për pronat do të aplikohen çmimet e zyrtarizuara në 2016- ën. Në të dyja rastet, pra si në rastin e shtëpive ashtu edhe të pronave, tatimi që do të paguhet është 3 përqindëshi i diferencës ndërmjet çmimit të sotëm me atë që është regjistruar.
ÇMIMET Gazeta boton sot tabelën me çmimet e pronave në kryeqytet, si edhe tabelat e plota me çmimet minimale fiskale që aplikohen në Tiranë dhe 11 qarqe të vendit. Njohja me këto vlera u jep mundësi qytetarëve që të llogarisin përfitimin që do të kenë nëse vendosin të rivlerësojnë pasurinë. Nga vlera aktuale e banesës apo pronës zbritet vlera e saj fillestare, më tej diferenca e dalë apo më saktë 3 për qindëshi i diferencës, do të jetë edhe tatimi që do të paguhet. Me amnistinë e re që ka nisur të aplikohet prej fillimit të këtij muaji, ulet në 5 për qind edhe detyrimi tatimor për bizneset. Përditësimi i çmimeve shihet si një mundësi e mirë, veçanërisht për ata të cilët duan ta shesin shtëpinë apo apartamentin që kanë në posedim, kjo sepse në momentin e shitjes, detyrimi tatimor reduktohet me disa herë më pak.
AFATET Pak ditë më parë u miratua edhe udhëzimi për mënyrën sesi do të bëhet rivlerësimi. Sipas këtij udhëzimi, punonjësit e Kadastrës do të kenë detyrimin që brenda 5 ditëve nga shlyerja e faturës, të hedhin të dhënat në sistem. "Drejtoria vendore e ASHK- së, brenda 5 ditëve nga verifikimi i pagesës së tatimit të rivlerësimit të pasurisë dhe tarifave të shërbimit, duhet të kryejë shënimet përkatëse në regjistrat e pasurive të paluajtshme për pasqyrimin e rivlerësimit, nëpërmjet punonjësit të ngarkuar me këtë detyrë". Krahas pagesës së taksës, që për shtëpitë dhe tokat është 3 për qind dhe për bizneset është 5 për qind, qytetarët do të kenë në ngarkim edhe një tarifë tjetër, atë të shërbimit, e cila është 1200 lekë.