Burgu i Lezhës kthehet në spital për të dënuarit e sëmurë
Tërmeti i 26 nëntorit shkatërroi godinën numër 2 të IEVP
Në ambientet e burgut të Shënkollit, në Lezhë, do të ndërtohet një spital ku do të trajtohen të dënuarit, të cilët janë me probleme mendore.
Sipas një dokumenti të siguruar nga Agjencia e Prokurimeve Publike, bëhet thirrje që kompanitë e interesuara për këtë ndërtim të paraqesin ofertat e tyre për objektin "Rikonstruksion në IEVP Lezhë, përqasje për spital të të sëmurëve mendorë". Vlera e investimit është rreth 4.6 milionë lekë, ndërsa detajet e këtij projekti dhe nisja e punimeve ende nuk dihen. Sipas informacioneve, mësohet se në këtë spital pritet që të trajtohen të burgosurit, të cilët kanë një raport mjekoligjor për sëmundjet përkatëse, pasi kjo ka qenë një problematikë e vazhdueshme në vendin tonë, e cila është trajtuar edhe nga ndërkombëtarët.
RAPORTI
Në një raport të vitit 2014 nga organet e Këshillit Europian thuhej se situata me të sëmurët që vuajnë dënimin nuk ka bërë përmirësime, duke kërkuar ndërhyrje e menjëhershme. Me rikonstruksionin e IEVP Lezhë, përqasjes për spital të të sëmurëve mendorë synohet që t'i jepet fund problematikës. Ende nuk dihet nëse godina e spitalit të burgut do të ndërtohet në ambientet aktuale të burgut të Shënkollit apo pranë saj. Ndërkohë, aktualisht, në burgun e Shënkollit në Lezhë ka 150 të burgosur, pasi pjesa tjetër e të burgosurve janë zhvendosur në burgun e Reçit në Shkodër, për shkak të dëmeve që kanë pësuar godinat nga tërmeti i 26 nëntorit. Një pjesë e godinave janë shpallur të pabanueshme si pasojë e dëmtimeve që kanë pësuar nga tërmeti, ndërsa drejtuesit e burgut nuk kanë asnjë informacion se çfarë do të bëhet me këto objekte si dhe me projektin që pritet të zbatohet në lidhje me spitalin për të burgosurit e sëmurë.
TRANSFERIMET
Në burgun e Shënkollit mësohet se funksionale është vetëm një godinë, ku mbahen të mbyllur rreth 150 të dënuar. Lëkundjet e forta sizmike të datës 26 nëntor 2019 bënë që struktura e burgut të pësojë dëmtime serioze. Godina numër 2 e këtij institucioni pësoi dëmtime të shumta. Sipas burimeve të ndryshme, mësohet se muret pësuan plasaritje në disa pjesë, duke sjellë frikë dhe panik te të burgosurit, por dhe te gardianët e këtij burgu. Duke parë rrezikun që paraqiste godina, Drejtoria e Përgjithshme e Burgjeve mori vendim për transferimin e të burgosurve të kësaj godine në institucione të tjera. Burgu i Shënkollit është ndërtuar në vitin 2003 dhe ka një kapacitet prej 650 të dënuarish. Ende nuk dihet nëse të dënuarit e transferuar do të qëndrojnë përkohësisht në burgun e Reçit apo do të rikthehen në ambientet e burgut të Shënkollit.