Grenell i vë fre Kurtit: Nuk ka reciprocitet me Serbinë
Priten “lajme të reja” gjatë muajit mars për bisedimet Kosovë- Serbi
Pak ditë pasi komplimentoi Kurtin për nismën për të hequr taksën 100 për qind ndaj Serbisë, emisari i Presidentit Donald Trump për bisedimet mes Kosovës e Serbisë ka përdorur “frena të forta” për reciprocitetin që kërkon Kurti si zëvendësim me taksën.
Kryeministri Albin Kurti mori përkrahje publike nga emisari Richard Grenell. Diplomati amerikan u shpreh se “Albini e ka mirë” për heqjen e taksës. Por ai nuk e përmendi vënien e reciprocitetit. Nga LDK- ja, partnere në koalicionin qeveritar me Vetëvendosjen e Kurtit, janë shprehur të vetëdijshëm se çështja do të jetë shumë e ndërlikuar. Por ja ku erdhi përgjigjja vetëm tri ditë më vonë. Një “jo” e qartë. Një kërkesë për të hequr taksën pa e zëvendësuar me asgjë, as reciprocitet, asnjë masë tjetër. Grenell tha se është kundër masave të reciprocitetit. Zëdhënësi i tij, Dick Custin, tha për “Radio Evropa e Lirë” se Grenell e inkurajon Kosovën që ta heqë taksën 100 për qind ndaj prodhimeve të importuara nga Serbia, por pa reciprocitet. “Kosova duhet ta heqë taksën ndaj mallrave të Serbisë pa reciprocitet. Jo vetëm ta pezullojë, por ta heqë plotësisht atë. Ambasadori nuk e mbështet idenë e reciprocitetit”, theksoi Custin. Kosova u ka vënë një taksë 100 për qind prodhimeve të importuara nga Serbia dhe Bosnje e Hercegovina në nëntor të vitit 2018. Kurti, i cili ka marrë detyrën e Kryeministrit javën e kaluar, ka thënë se kjo masë do të zëvendësohet me reciprocitet ndaj Serbisë dhe se reciprociteti do të zbatohet “në aspektin ekonomik, tregtar dhe politik”. Por tashmë mësoi se nuk e ka mbështetjen e SHBA- së për këtë. Ndërkohë, emisari i Presidentit të SHBA- së, Donald Trump, ka paralajmëruar së shpejti lajme të reja për Kosovën e Serbinë. Në një intervistë për “Associated Press”, Grenell ka paralajmëruar lajme të reja për zhvillimet mes Kosovës dhe Serbisë. Diplomati amerikan ka arritur të rikthejë linjën e drejtpërdrejtë ajrore mes Kosovës e Serbisë për herë të parë pas 21 vitesh dhe ka paralajmëruar një marrëveshje të ngjashme për hekurudhat. Sa për marrëveshjen përfundimtare, qëllimi është që dy palët ta arrijnë brenda vitit, por kjo është e vështirë të ndodhë. Zyra e Grenellit në Berlin, në një përgjigje për gazetën e Kosovës, “Express”, njoftoi se emisari i Presidentit Trump, “Ambasadori Grenell nuk ka vënë ndonjë afat për marrëveshjen finale mes Kosovës dhe Serbisë. Përderisa dy palët vazhdojnë të bisedojnë, ai do të jetë i përfshirë”, sipas Dick Custin, këshilltar për Marrëdhëniet me Publikun në ambasadën e SHBA- së në Berlin. Presidenti serb, Aleksandar Vuçiç, në mars do të pritet në Berlin nga Kancelarja gjermane, Angela Merkel. Mediat aluduan se ajo ka përgatitur një propozim për Kosovën e Serbinë, por asgjë zyrtare. Presidenti serb, Vuçiç, e ka mohuar se ka një plan për Kosovën. Për më tepër tani, në Serbi siç dihet tashmë pritet të mbahen zgjedhjet. Ndërsa ambasadori gjerman në Kosovë, Christian Heldt, i ka dhënë Kryeministrit të Kosovës, Albin Kurti, urimin për zgjedhjen dhe ftesën e Kancelares për një takim në Berlin. Edhe pse marsi i vitit 2020 është përmendur edhe gjatë vitit të kaluar si muaji i arritjes së marrëveshjes finale, gjasat për këtë janë shumë të pakta për Kosovën e Serbinë.