Cikalleshi “vallëzon” para Domgjonit, gol Selmanit për "play- off"- in e elitës
Bomberi i Kombëtares ia ka dalë që të shënojë përballë një mbrojtësi dhe portieri shqiptar, ku gjithçka është ndarë në barazim. Në ndeshjen e Ligës së Dytë turke, Sokol Cikalleshi është ndarë në paqe me Gentjan Selmanin dhe David Domgjonin.
GOLI Sokol Cikaleshi ka qenë protagonist kryesor me skuadrën e tij, në barazimin që ekipi i Akhisarsporit ka arritur ndaj Menemensporit. Kjo ka qenë një përballje mes shqiptarësh, teksa tek ekipi mik ka debutuar David Domgjoni, pas transferimit nga Laçi dhe në portë është titullar që nga fillimi i sezonit, Gentjan Selmani. Ndeshja përfundoi në barazim 2- 2, ku një nga golat u shënua nga Cikalleshi. Ky i fundit në minutën e 67', pasi bën disa lëvizje të bukura në zonën e kundërshtarëve, gjuan bukur topin dhe e çon në rrjetë duke mposhtur portierin Selmani. Përballë, Cikalleshi pati 3 mbrojtës kundërshtarë, një prej të cilëve ishte Domgjoni. Ky i fundit e pengoi fillimisht për të mos i lejuar goditjen, por bomberi i Kombëtares çliroi mundësinë e gjuajtjes dhe e dërgoi sferën fort dhe tokazi në cepin e djathtë të Selmanit, pa i dhënë mundësi reagimi këtij të fundit. Një gol shumë i bukur nga sulmuesi shqiptar, por nuk i vlejti maksimalisht ekipit të tij për të marrë fitoren, pasi miqtë realizuan dy herë me Yildirim dhe Boztepe, duke barazuar rezultatin. Me këtë barazim, Akhisarspor renditet në vendin e 6- të me 29 pikë, ndërsa Menemenspori në vendin e 8- të po ashtu me 28 pikë. Për Cikalleshin ky ishte goli i gjashtë i shënuar gjatë këtij edicioni në Ligën e Dytë turke. Goli i barazimit nga miqtë në minutën e 89- të, solli edhe tensionin teksa për Akhisarspor doli me të kuq Babaxhan. Për të ruajtur rezultatin, trajneri i Akhisarspori zgjodhi që të largojë nga fusha Sokol Cikalleshin për të shtuar mbrojtësit, por në fund nuk ia doli që të marrë fitoren.