Anti- KÇK, Soreca: Do monitorojmë, vendimet nga gjykatat
"Të drejtat themelore të të akuzuarve të respektohen plotësisht dhe asetet të konfiskohen dhe sekuestrohen, por sipas ligjit"
Ambasadori i Bashkimit Europian në Tiranë, Luigi Soreca, tha dje se partnerët ndërkombëtarë do të monitorojnë zbatimin e ligjit anti- KÇK.
Në një konferencë për shtyp, Soreca nënvizoi se janë dy kushte kryesore që zbatimi i këtij ligji të jetë në përputhje me shtetin e së drejtës. Ai tha se të drejtat e të akuzuarve duhet të respektohen plotësisht dhe se SPAK- u duhet të konfirmojë të gjitha veprimet e ndërmarra nga Policia dhe t'ia kalojë dosjen Gjykatës për marrjen e vendimit për konfiskimin e pasurisë së subjektit. "Ligji anti- KÇK tregon gatishmërinë politike për të trajtuar problemin. Ajo çfarë është e rëndësishme është mënyra sesi do të zbatohet ky ligj. Zbatimi është thelbësor, është kyç. Dhe ne shohim dy kushte kryesore, që zbatimi të jetë në përputhje me shtetin e së drejtës. Së pari, që të drejtat themelore të të akuzuarve të respektohen plotësisht, pra të subjekteve që janë të dënuar ose persona që janë në hetim për krime të organizuara. Të drejtat e tyre do të duhet të respektohen. Ky është një kusht", tha ambasadori i BEsë në Tiranë. Duke iu përgjigjur akuzave të bëra lidhur me marrjen e kompetencave të gjykatave nga Policia në zbatimin e paketës anti- KÇK, ambasadori Soreca tha se vendimet duhet t'i japin gjykatat për çdo sekuestrim apo konfiskim prone. "Asetet të konfiskohen, sekuestrohen, por të respektohet procesi i duhur ligjor, në mënyrë që të gjithë të kenë të drejtën t'u respektohen të drejtat themelore. Do ta monitorojmë këtë nga afër, do flasim me SPAK- un. Kushti i dytë ka të bëjë me drejtimin e këtij operacioni. SPAK- u siç e dimë, nga parashikimet e ligjit duhet të konfirmojë të gjitha veprimet e ndërmarra nga Policia dhe t'ia kalojë dosjen Gjykatës për marrjen e vendimit për konfiskimin", u shpreh Soreca. Këto deklarata, ambasadori i Bashkimit Europian i bëri gjatë prezantimit të sondazhit të realizuar nga ' Ipsos' për pritshmëritë që kanë shqiptarët për BE. Referuar përgjigjeve të bëra, nuk ka ndryshuar mbështetja që shqiptarët i japin anëtarësimit në BE. Më konkretisht, si në 2018, ashtu edhe në 2019, 85% e tyre kanë votuar ' pro'. Pyetjes se "A mendojnë shqiptarët që BE- ja e trajton mirë Shqipërinë?", edhe këtu nuk ka pasur ndryshim me vitin e kaluar, 28% kanë qenë plotësisht dakord. Sipas ambasadorit, zbatimi i këtij ligji përbën dhe çelësin për t'u anëtarësuar në BE. "Anti- KÇK, çelësi për të hyrë në BE. Është arritur progres. Reforma në Drejtësi, kur të bëhet plotësisht, do të përbëjë armën më të fortë kundër krimit të organizua", u shpreh Soreca.