Basha, pas takimit me Sorekën: Duhen zgjedhje të parakohshme
“Gjithçka që po shohim sot, është produkt i krizës politike”
Kryetari i Partisë Demokratike e nisi ditën dje me një takim rreth një orë me kryediplomatin e BE- së në Shqipëri, Luigi Soreca.
Në përfundim të takimit, kreu i selisë blu, në një prononcim për mediat, u shpreh se opozita nuk tërhiqet nga kërkesa për zgjedhje të parakohshme lokale dhe vendore në një ditë. “Gjithë beteja jonë është që zgjedhjet e parakohshme të bëhen sa më shpejt dhe shqiptarëve t’u rikthehet mundësia të zgjedhin me votë institucionet e tyre, duke filluar me Parlamentin, me bashkitë e vendit. Kjo është rruga e vetme për të ndalur krizën politike, për të ndalur gremisjen e vendit. Për t’u dhënë mundësinë shqiptarëve të zgjedhin qeverisjen e tyre, një qeverisje që t’u shërbejë dhe t’u ofrojë më shumë mundësi ekonomike, punësimi, që të rinjtë të rrinë e të ndërtojnë jetën e tyre këtu e jo të largohen”, tha kryedemokrati Basha. Sipas kreut të selisë blu, Shqipëria po performon keq në çdo aspekt dhe për këtë ai bën përgjegjëse krizën politike, të cilën e shkaktoi Kryeministri. “Gjithçka që po shohim sot në këtë vend, bjerrja e shpresës, kriza ekonomike, është produkt i krizës politike, së cilës, në fakt, emrin ia ka vënë vetë i pari qeverisë. Kriza politike është krijuar pikërisht nga mentaliteti i KÇK- së. Sepse KÇK- ja në Shqipëri është qeveria, është Kryeministri dhe veglat e tij në pushtet”, tha kreu i opozitës.
REFORMA ZGJEDHORE
Më tej, kreu i selisë blu, Lulzim Basha, akuzoi Kryeministrin Rama se bashkëpunon me kriminelët për të qëndruar në pushtet. Kjo situatë, sipas Bashës, e bën emergjente Reformën Zgjedhore për t’u kthyer shqiptarëve një të drejtë themelore. “Është thirrja e çdo shqiptari që ta nxjerrim vendin nga kjo krizë, që të bëhemi bashkë për ta nxjerrë vendin nga kjo gjendje. Dhe kjo kalon vetëm duke u dhënë mundësinë shqiptarëve të zgjedhin qeverinë, Parlamentin dhe kryebashkiakët që duan ata të zgjedhin, në një proces të lirë dhe të ndershëm zgjedhor. Kjo është beteja. Pa u zgjidhur kjo, vendi nuk do të bëjë dot përpara. Ndaj, gjithë fokusi ynë është që edhe procesin e integrimit europian të vendit, edhe procesin e zgjidhjes së krizës politike, ashtu siç i ka parashikuar Bundestagu gjerman, t’i kalojmë mes Reformës Zgjedhore dhe zbatimit të kësaj Reforme Zgjedhore, që do të thotë: Zgjedhje të lira e të ndershme”, u shpreh zoti Basha. Ndërkohë, kryedemokrati u zotua që Reforma Zgjedhore të përfundojë më 15 mars, siç është parashikuar. “Ne po bëjmë çdo përpjekje dhe, nga ana jonë, nuk do të ketë asnjë pengesë, përkundrazi ka një angazhim total që reforma të përfundojë më 15 mars. Sigurisht, nuk varet vetëm nga ne. Një pjesë po kaq të rëndësishme, madje më të rëndësishme, ka dhe pala tjetër, e cila sot ka edhe pushtetin”, përfundoi Basha.