SPAK i kthen dy dosje OFL, kush janë dy emrat e rinj që morën letër për pasurinë
Ambasada amerikane tregon testet që kaluan 18 kandidatët
Nga 300 metra vrapim, te testet me shkrim, këto janë provat që kanë kaluar deri më tani kandidatët për drejtues të Byrosë Kombëtare të Hetimit.
Ka qenë ambasada e Shteteve të Bashkuara të Amerikës, që me anë të një postimi në faqen zyrtare të “Facebook”, ka dhënë detaje nga procesi i përzgjedhjes së kreut të Byrosë, strukturës hetimore të Prokurorisë së Posaçme( SPAK). Pas përfundimit të këtyre fazave, do të përzgjidhen 6 kandidatë me pikëzimin më të lartë, që do t’i nënshtrohen testit të së vërtetës dhe intervistës finale. Ambasada e konsideron procesin transparent dhe të bazuar në praktikat e FBI- së. Byroja Kombëtare e Hetimit konsiderohet si njësi shumë e rëndësishme hetimore, që do të jetë në varësi të SPAK- ut. “Shtetet e Bashkuara janë të përkushtuara në mbështetjen e përpjekjeve të Shqipërisë për të forcuar sundimin e ligjit përmes proceseve transparente. Nën monitorimin e qeverisë së SHBA- së, komisioni përzgjedhës i SPAK- ut është tashmë në fazat përfundimtare të përcaktimit të kandidatit më të mirë për drejtor të Byrosë Kombëtare të Hetimit ( BKH). Në përputhje me ligjin e SPAK- ut dhe frymëzuar nga praktikat më të mira të FBI- së, kandidatët e mundshëm duhet të dëshmojnë aftësitë e tyre në një larmi provash. Në 6 shkurt, kandidatët iu nënshtruan një prove të aftësive fizike, që përfshinte 300 metra vrapim me shpejtësi, 2.4 kilometra vrap dhe ushtrime të tjera. Pas këtij provimi, më 10 shkurt kandidatët morën pjesë në një testim me shkrim me dy pjesë, për të provuar aftësinë e tyre të shkrimit profesional dhe për të sprovuar aftësitë e tyre në shkathtësinë mendore dhe zgjidhjen e problemeve. Rezultatet nga provimet i shtohen një totali përmbledhës dhe do të përcaktojnë gjashtë kandidatët kryesorë që do të kalojnë në fazën përfundimtare: në testimin poligrafik dhe intervistën finale. Ky proces transparent dhe objektiv është një hap tjetër drejt vendosjes së sistemit të drejtësisë, etik, transparent dhe profesional që qytetarët meritojnë”, shkruhet në njoftimin e ambasadës.
BKH DHE PËRBËRJA Byroja Kombëtare e Hetimit është një strukturë e specializuar e Policisë Gjyqësore, që vepron vetëm nën drejtimin e Prokurorisë së Posaçme. Drejtori, zëvendësdrejtori dhe hetuesit e Byrosë Kombëtare të Hetimit gëzojnë statusin e oficerit të Policisë Gjyqësore. BKHja organizohet dhe vepron sipas një urdhri të përbashkët të drejtorit të Byrosë Kombëtare të Hetimit dhe drejtuesit të Prokurorisë së Posaçme. “Byroja Kombëtare e Hetimit përbëhet nga drejtori, zëvendësdrejtori, hetuesit dhe punonjësit e administratës. Ajo ka gjithashtu në përbërje të saj shërbime të Policisë Gjyqësore, të përbëra nga oficerë të Policisë Gjyqësore, nga Policia e Shtetit dhe institucionet e tjera përkatëse, të cilët janë nën drejtimin administrativ të zëvendësdrejtorit të Byrosë Kombëtare të Hetimit dhe nën varësi procedurale hetimore të Prokurorisë së Posaçme”, parashikohet në ligj.