Kosovë- Serbi pakt edhe për hekurudhat, flet Rama për Mini- Shengenin: Jo plan B për BE
Marko Gjuriç ngurron të vendosë firmën në marrëveshje, e përmend ambasadori Grenell: Mund të nënshkruani!
Kosova dhe Serbia kanë nënshkruar tri marrëveshje të ndërmjetësuara nga emisari i Trump për dialogun, ambasadori amerikan në Gjermani, Richard Grenell.
Përveç dy marrëveshjeve fillestare të njoftuara në javën e kaluar, atë për hekurudhat dhe atë për autostradat, dy palët kanë nënshkruar edhe marrëveshje për lidhjen e re me autostradë. Pak para nisjes së Konferencës së Sigurisë në Mynih, i dërguari i posaçëm i Presidentit Donald Trump për dialogun, Richard Grenell, ka mbledhur ekipet e të dyja vendeve. Në praninë e dy presidentëve, Hashim Thaçi dhe Aleksandar Vuçiç, marrëveshjet janë nënshkruar nga Xhemë Veseli, drejtor i Transportit Rrugor, dhe Ramë Qupeva, drejtor i Infrastrukturës Rrugore për palën e Kosovës, në prani të Presidentit Hashim Thaçi. Ndërsa nga Serbia ka nënshkruar drejtori i Zyrës për Kosovën në Qeverinë e Serbisë, Marko Gjuriç, në praninë e Presidentit të Serbisë, Aleksandar Vuçiç. Kosova dhe Serbia, muajin e kaluar, kanë nënshkruar marrëveshje për hapjen e linjës së veçantë ajrore të fluturimeve Kosovë - Serbi. Kjo marrëveshje ishte nënshkruar në Berlin, me ndërmjetësimin e ambasadorit amerikan, Richard Grenell. Të premten u nënshkruan edhe dy marrëveshjet e tjera. Të pranishëm gjatë nënshkrimit të marrëveshjeve ishin edhe ambasadori amerikan në Prishtinë, Philip Kosnett, dhe ai në Beograd, Anthony Godfrey. NGURRIMI I GJURIÇ Në kohën kur Richard Grenell po i udhëzonte dy përfaqësuesit e Ministrisë së Infrastrukturës së Kosovës, Ramë Qupeva dhe Xhemë Veseli si dhe Marko Gjuriç për Serbinë për të nënshkruar marrëveshjet, ky i fundit ishte hutuar dhe dukej sikur po ngurronte. Ishte Richard Grenell ai që e përmendi kur e vuri re një gjë të tillë, duke i thënë Gjuriçit: "Mund të nënshkruani". Nuk ka detaje se si ishin emërtuar tekstet e marrëveshjeve të mirëkuptimit, nëse ambasadori amerikan e ka emërtuar Kosovën si Republikë, por nëse ka ndodhur kështu, kjo mund të ketë qenë arsyeja e përhumbjes së Gjuriçit dhe pasiguria për të nënshkruar. Nga ekzekutivi i Kosovës janë shprehur se nuk i njohin detajet e marrëveshjeve që janë nënshkruar dhe nuk mund të komentojnë për to.
"HISTORIKE" Ambasadori Grenell i quajti marrëveshjet historike dhe tha se të dyja shtetet duhet të përqendrohen në zhvillimin ekonomik. Sipas Presidentit të Kosovës, Hashim Thaçi, marrëveshjet janë mesazh për paqe dhe zhvillimin ekonomik të rajonit. Thaçi ka përmendur mundësinë e arritjes së marrëveshjes përfundimtare me Serbinë gjatë këtij viti. Edhe Presidenti i Serbisë, Aleksandar Vuçiç, marrëveshjet e nënshkruara i ka cilësuar lajm të mirë për rajonin. Presidenti Thaçi dhe ai i Serbisë, Vuçiç, kishin një përshëndetje "të ftohtë" pas ceremonisë së nënshkrimit në Mynih. KËNDVËSHTRIMI I
VUÇIÇ Presidenti i Serbisë, Aleksandar Vucic, pas përfundimit të takimit ku u nënshkruan dy marrëveshjet e fundit, Letra Mirëkuptimi Prishtinë- Beograd, ka folur para gazetarëve. Marrëveshjet e nënshkruara me ndërmjetësimin e Grenell, Presidenti serb i konsideroi si çështje teknike, duke u shprehur se "Ne mund të diskutojmë çështje që i përkasin avancimit ekonomik, nuk kemi problem me këtë gjë, por ne nuk do të diskutojmë për statusin derisa nuk hiqet taksa. Kjo është, dhe ne po presim që taksa të hiqet".