Lista për BKH, 8 kandidatë te makina e së vërtetës
Ministri i Brendshëm Sandër Lleshaj paralajmëroi nga Vlora se pas Njësisë Anti- KÇK, radha do të jetë e Njësisë Antikorrupsion, e cila u përmend edhe nga kryeministri Edi Rama. Lleshaj tha se bëhet fjalë për krijimin e një strukture, e cila do të adresojë me theks të veçantë krimin ekonomik dhe korrupsionin. Megjithatë, u shpreh se nuk mund të thotë se si do të jetë trajta përfundimtare e saj. Pas analizës që zhvilloi dje në Prefekturën e Vlorës, Lleshaj u shpreh se për vitin 2020, prioritet mbetet goditja e krimit të organizuar dhe kryesisht financat e tyre. Në përfundim të analizës, ai iu përgjigj pyetjeve të gazetarëve, që shprehën interes fillimisht për njësinë Antikorrupsion dhe se kur do të formalizohet. "Njësia është në krijim e sipër, nuk mund të them sesi do të jetë trajta përfundimtare e saj, por bëhet fjalë për krijimin e një strukture, e cila do të adresojë me theks të veçantë krimin ekonomik dhe korrupsionin, dy fusha të cilat meritojnë qasje të re. Vetëm kaq mund të them sot", u shpreh Lleshaj. Ndërsa, nisur nga fakti se OFL ende nuk po vepron në Vlorë, gazetarët e pyetën ministrin nëse do të shtrihet edhe në këtë qytet
Anti- KÇK- ja. Por Lleshaj tha se lufta kundër krimit nuk ka kufizime gjeografike, ajo do të shtrihet në të gjithë territorin e Republikës së Shqipërisë. "Situata, jo vetëm në Vlorë, por në të gjithë Shqipërinë, statistikisht është më e mirë sesa të gjitha vitet që kemi kaluar, por sigurisht kjo nuk është një arsye që ne të flemë. Përkundrazi, ne synojmë të shtojmë intensitetin e punës së Policisë dhe strukturave të tjera për ta përmirësuar më tej rendin, sigurinë publike në Vlorë. Ne, sigurisht, mendojmë dhe besojmë fort që mbështetja e Policisë është mbështetje për qytetarët. Ne do të vazhdojmë ta mbështesim Policinë në mënyrë që ajo t'i ketë të gjitha atributet për ta plotësuar misionin e saj mjaft të ndërlikuar dhe të vështirë", tha ministri i Brendshëm. I pyetur për disa emra të prekur nga OFL- ja, për të cilët ka vendime gjykatash për sekuestrimin e pasurive dhe vendimet që nuk priten, Lleshaj tha se: "Ligji i parashikon këto situata. Ligji nuk konkurron, nuk krijon situata konkurruese midis procedurave të ndryshme. Nëse ka procedura që po zhvillohen ndërkohë nga gjykata, ligji nuk vepron". Sipas Lleshajt, qëllimi i gjithë përpjekjes së tanishme është që ky model biznesi të shkatërrohet përmes goditjes së financave dhe aseteve kriminale, duke siguruar kështu që me shterimin e këtyre burimeve, që e mbajnë gjallë krimin, të kontribuohet në reduktimin e përgjithshëm të kriminalitetit dhe krimit të organizuar në vend.