Qeveria kujdestare, Basha: Masa nëse s’reagon maxhoranca
Qeveria teknike, kryetari i PD: Shqipëria është në një krizë të thellë kushtetuese, ekonomike dhe politike
Zgjedhjet e parakohshme të organizuara nga një qeveri kujdestare janë e vetmja rrugë sipas kryedemokratit Lulzim Basha, për të kthyer në Shqipëri normalitetin politik.
Në një deklaratë për mediat ditën e djeshme pas takimit me ekspertët e Komisionit të Venecias, kreu i selisë blu paralajmëroi se opozita do të reagojë nëse nga ana e maxhorancës do të tentohet që përmes bashkëpunimit të qeverisë me bandat kriminale, t'u heqë qytetarëve pushtetin e tyre që është vota. Ashpërsimi i gjuhës së kryetarit të PD- së vjen në një kohë kur përfaqësues të rëndësishëm të maxhorancës janë shprehur se zgjedhjet e ardhshme janë në 2021 dhe nuk mbështesin krijimin e qeverisë tranzitore para zgjedhjeve. "Zgjidhja që ne kërkojmë, nuk po e kërkojmë për veten tonë. Ne sakrifikuam gjithçka për t'i hapur rrugën një zgjidhjeje politike për shqiptarët, jo për veten tonë. Nëse pala tjetër do të vazhdojë të përdorë në mënyrë të paligjshme pushtetin e paligjshëm, paratë e pista të krimit të organizuar dhe të vendosë interesat e pushtetit të vet dhe të atyre me të cilët ka ardhur në pushtet, kriminelëve dhe oligarkëve, kundër interesave të shqiptarëve, atëherë opozita bashkë me qytetarët do të marrin vendimet që i takojnë një shoqërie europiane, për t'u përballur me një grusht njerëzish që kanë marrë peng vendin", tha Basha.
AKUZAT
Kryetari i selisë blu akuzon Kryeministrin Rama se javët e fundit po bën përpjekje të shtuara për të kapur çdo institucion shtetëror. Kalimi në Parlament i ndryshimeve në ligjin organik të Gjykatës Kushtetuese, që i rrëmben kompetencat Presidentit në një kohë, ka një kërkesë për opinion nga Komisioni i Venecias për këtë çështje. "Shqipëria është në një krizë të thellë kushtetuese dhe politike. Ilustrimi më i mirë i kësaj krize në javët e fundit janë lëvizjet e çoroditura të një pushteti, i cili nuk pret as për opinionin e Venecias, por ka çuar për miratim në një Kuvend ilegjitim, masa të tjera që forcojnë kapjen e shtetit, kapjen e drejtësisë, kapjen e Gjykatës Kushtetuese. E gjitha kjo ka çuar vendin në kolaps total", vijoi Basha. Nismat e fundit ligjore të qeverisë aktuale, sipas kryedemokratit Basha dëmtojnë demokracinë dhe cenojnë të drejtat e qytetarëve. "Të drejtat e qytetarëve janë të kërcënuara, prona e qytetarëve është e kërcënuar, jeta e qytetarëve është e kërcënuar, siguria e qytetarëve është e kërcënuar, sepse shteti shqiptar, Republika e Shqipërisë sot nuk është e shqiptarëve, por është e një grushti pushtetarësh të lidhur me një grusht kriminelësh dhe oligarkësh, që së bashku kanë kapur zgjedhjet, Parlamentin, bashkitë, Gjykatën Kushtetuese, gjykatat e vendit, pronat e shqiptarëve. Gjithçka në këtë vend kontrollohet nga një grusht njerëzish. Kjo nuk është demokraci. Ky nuk është shteti ligjor", tha Basha.
ZGJIDHJA
Për të kaluar situatën e rëndë politike, ekonomike e sociale në të cilën ndodhet vendi, sipas Bashës duhen zgjedhje me standarde në mënyrë që pushteti të mos kujdeset për oligarkët, por për qytetarët. "Të kthehet legjitimiteti i institucioneve. Të kemi një Parlament që e ka të lidhur fatin me qytetarët. Një Parlament dhe një qeveri që e ka fatin të lidhur me qytetarët, do t'u shërbejë qytetarëve. Një Parlament, një qeveri, një Kryeministër që ka dalë, siç kemi dëgjuar nga dosjet 184 dhe 339, nga bashkëpunimi me bandat dhe krimi i organizuar, është peng i tyre, do t'u shërbejë atyre, do t'i shërbejë oligarkisë", përfundoi Basha.