Rama, takime me liderët botërorë në prag të Konferencës

Konferencën për Sigurinë në Mynih, Kryeministri Rama e ka shfrytëzuar për të lobuar dhe për të marrë mbështetje për procesin e rindërtimin pas tërmetit të 26 nëntorit. Në prag të Konferencës së Donatorëve, Rama është me Kryeministrin e Kanadasë, Justin Trudeau, Princin Faisal bin Farhan Al- Saud, ministri i Jashtëm i Arabisë Saudite dhe homologun e Kuvajtit, Sabah Al Khalid Al Sabah. Në takimin me Kryeministrin e Kanadasë, Rama mori garancinë nga Trudeau se vendi i tij do të marrë pjesë në Konferencën e Donatorëve si shenjë falënderimi për operacionet e përbashkëta që të dyja vendet kryejnë së bashku në kuadër të bashkëpunimit në NATO. "Kanadaja është angazhuar për të marrë pjesë edhe në Konferencën e Rindërtimit, në shkurt. Kemi punuar shumë mirë bashkë në misionet e NATO- s. Shqiptarët po kryejnë shërbimin përkrah Kanadasë në Letoni për mision ' Enhanced Forward Presence' dhe është kënaqësi të vazhdojmë të shkëmbejmë dhe të kemi një bashkëpunim kaq të mirë me ju, ndërsa ecim përpara", tha Justin Trudeau. Ndërsa Rama, duke e falënderuar homologun e tij kanadez, shprehu dëshirën për thellimin e marrëdhënieve mes dy vendeve. "Mirënjohës që do të jeni i pranishëm në Konferencë. Duam t'i forcojmë marrëdhëniet. E di që jemi larg, por në njëfarë mënyre ndihemi shumë të afërt me vendin tuaj dhe të gjithë ju. Prandaj faleminderit për kohën dhe faleminderit që u ulët nga ana e flamurit shqiptar", u shpreh Rama. Por të njëjtën mbështetje kanë garantuar edhe Kryeministri i Kuvajtit dhe ministri saudit, Farhan Al- Saud. Kuvajti më herët, përmes ambasadorit të tij në Tiranë, e ka shprehur disa herë gatishmërinë për të marrë pjesë në procesin e rindërtimit në Shqipëri.