Kreu i BKH, kush janë 8 pretendentët që do të kalojnë testin e së vërtetës
Shtatë aplikantë janë nga radhët e Policisë së Shtetit, një prej tyre është prokuror. Pritet intervista dhe testi i poligrafisë
Shtatë kandidatë që vijnë nga radhët e Policisë së Shtetit dhe një prokuror kanë arritur të kalojnë në fazën përfundimtare të procesit të përzgjedhjes së drejtuesit të Byrosë Kombëtare të Hetimit.
Më anë të një njoftimi zyrtar, Struktura e Posaçme Antikorrupsion bëri të ditur se janë përfunduar testet fizike, logjike dhe në shkrimin e raporteve, duke kaluar në fazën përfundimtare 8 kandidatë, pasi kanë pasur cilësi shumë të mirë. "Komisioni i Përzgjedhjes për drejtorin e BKH- së ka përfunduar vlerësimin e testit të aftësive fizike, testit të arsyetimit logjik dhe të aftësive për të shkruar raporte dhe ka llogaritur pikët totale për secilin kandidat, për të identifikuar kandidatët më të mirë për drejtor të BKH- së, që do të marrin pjesë në fazat e tjera të përzgjedhjes. Komisioni mbeti shumë i kënaqur nga cilësia dhe performanca e aplikantëve dhe si pasojë ka vendosur që të rrisë numrin që do të konkurrojë në fazat e fundit nga 6 në 8 kandidatë. Më poshtë jepet lista e kandidatëve që do të ftohen të marrin pjesë në fazat e mëtejshme të përzgjedhjes", njoftoi dje SPAK.
KANDIDATËT
Zëvendësdrejtuesja e Policisë së Shtetit, Aida Veizaj, është një prej kandidatëve që ka kaluar me sukses fazat e para. Veizaj, më herët, ka qenë drejtuese e Kufirit dhe Migracioni, drejtuese e Drejtorisë për Hetimin e Pastrimit të Parave dhe jo vetëm. Ardian Çipa është kandidati tjetër që pret të kalojë në makinën e së vërtetës. Çipa ka qenë drejtues në Drejtorinë e Përgjithshme për Hetimin e Krimit të Organizuar dhe Krimeve të Rënda, ndërsa aktualisht është në sektorin për mbrojtjen e dëshmitarëve. Gentjan Shehaj është një tjetër kandidat nga radhët e Policisë. Shehaj ka drejtuar Policinë e Vlorës, ndërsa në mars të 2019- ës është larguar për të marrë një detyrë në Akademinë e Sigurisë. Lindita Nushi, gruaja e dytë në listën për drejtimin e BKH- së, vjen gjithashtu nga radhët e Policisë, Nushi ka drejtuar Drejtorinë Rajonale të Kufirit dhe Migracionit në Durrës. Idajet Faskaj, gjithashtu pjesë e Policisë, ka qenë drejtues i Departamentit të Krimit të Organizuar. I vetmi që vjen nga radhët e Prokurorisë është Ylli Pjetërnikaj. Ky i fundit ka nisur detyrën në Prokurorinë e Kukësit, ndërsa aktualisht është në Prokurorinë e kryeqytetit.
KRITERET
Kandidatët e pranuar janë diplomuar për drejtësi ose kanë arsim të lartë policor. Kanë pasur të paktën 5 vite eksperiencë punë si prokurorë ose punonjës Policie, në luftën kundër korrupsionit dhe krimit të organizuar. Gjithashtu, të 18 kandidatët kanë firmosur deklaratë për dhënien e pëlqimit të tij dhe familjarëve të tij që heqin dorë nga privatësia. Në kushtet kur kërkojnë të jenë pjesë e BKH- së, ata duhet të jenë dakord me kontrollin e llogarive dhe telekomunikimeve vetjake.