Mashtroi Policinë për vjedhjen e shtëpisë, i gjendet armë
I riu u mbajt në vëzhgim në Vorë pas dyshimeve, kishte pistoletë
Një 25- vjeçar, që sipas Policisë mund të ketë qenë duke planifikuar ndonjë grabitje me armë, ka bërë një telefonatë të rreme sikur po i vidhnin shtëpinë, por ka përfunduar vetë në pranga.
Ngjarja pretendohej se po ndodhte në Vorë, ku i riu fliste për një makinë të dyshimtë pranë shtëpisë së tij. Sipas Policisë, telefonata e 25vjeçarit është marrë me seriozitet dhe janë kryer të gjitha verifikimet në adresën që ai ka dhënë. Por pasi aty nuk është konstatuar asgjë, kanë lindur dyshime për njoftimin që ai vetë kishte dhënë. Për këtë arsye, ai është mbajtur në vëzhgim nga efektivët e Policisë dhe në një moment është ndaluar për kontroll, gjatë të cilit i është gjetur me vete një pistoletë pa leje. "25vjeçari tentoi të mashtronte shërbimet e Policisë, por pas mbajtjes në vëzhgim dhe veprimeve të shpejta profesionale, u bë arrestimi i tij në flagrancë. Sekuestrohen në cilësinë e provës materiale një armë zjarri pistoletë dhe municion luftarak, të cilat iu gjetën në trup 25- vjecarit", tha zyrtarisht Policia. Ndërsa sqaroi se shërbimet e Komisariatit të Policisë Vorë, pas njoftimit të marrë nga shtetasi A. M. se aftër banesës së tij ndodhej një automjet dhe dyshonte se kishte shkuar për të vjedhur në banesën e tij, menjëherë organizuan punën. Fillimisht u ushtrua kontroll në automjetin e dyshuar që pretendohej nga 25- vjeçari A. M., por gjatë kontrollit dhe verifikimeve nuk ka rezultuar asnjë problem. Shërbimet e Policisë, bazuar në veprimet dhe thëniet kontradiktore të shtetasit A. M., e kanë mbajtur nën vëzhgim këtë shtetas prej disa orësh dhe gjatë operacionit policor të koduar "Vora", në aksin rrugor Sharke - Vorë kanë ndërhyrë duke e kontrolluar. "Gjatë kontrollit fizik, atij iu gjet një armë zjarri pistoletë, me një krehër me fishekë luftarak, të cilat u sekuestruan në cilësinë e provës materiale", tha zyrtarisht Policia e Tiranës.
TENTATIVA E GRABITJES
Nga ana e shërbimeve të Komisariatit nr. 5 të Kamzës, është arritur të parandalohet grabitja me armë e një marketi, gjatë operacionit të koduar "Laknasi", ku u arrit arrestimi në flagrancë i një 20- vjeçari. Ky i fundit dyshohet se po planifikonte të vidhte me armë në një market, në Laknas. Policia tha dje se, në vijim të punës për parandalimin e vjedhjeve, kapjen dhe arrestimin e personave që tentojnë të kryejnë vjedhje me dhunë e armë, në orët e mbrëmjes së datës 13 shkurt, Seksioni i Policisë Kriminale të Komisariatit të Policisë nr. 5 ka marrë informacion në rrugë operative se në Laknas, një shtetas 20vjeçar qarkullonte në orët e pasdites, me biçikletë, duke mbajtur me vete një çantë shpine, brenda së cilës dyshohej se mund të kishte armë zjarri. Bazuar në këto informacione, është organizuar, zhvilluar dhe finalizuar operacioni policor i koduar "Laknasi". Shërbimet e Policisë, gjatë operacionit kanë bërë të mundur lokalizimin e vendndodhjes dhe identifikimin e shtetasit të dyshuar, i cili qarkullonte me një biçikletë dhe në çantën e shpinës kishte një armë zjarri "Kallashnikov". Në momentet që ky shtetas po përgatitej të hynte në një market në Laknas, shërbimet e Policisë kanë ndërhyrë duke e prangosur në flagrancë shtetasin K. K., 20 vjeç. Gjatë kontrollit fizik, atij i është gjetur në çantën e shpinës, një automatik model 56, me një krehër me 17 fishekë.