Loja me shkresat, Meta kërkon dorëheqjen e ministres
Presidenti informon reporteren Santos: Qëllimi i vetëm i kësaj maxhorance është rikthimi i diktaturës përmes ' mjeteve ligjore'
Pa kaluar 24 orë nga denoncimi që bëri ndaj ministres së Drejtësisë, Etilda Gjonaj, se në bashkëpunim me zyrtarë të tjerë të lartë të ministrisë kanë bashkëpunuar për t'i rrëmbyer kompetencat Presidentit, Ilir Meta paralajmëroi dje se do ta padisë penalisht në Prokurorinë e Posaçme Antikorrupsion.
Sipas Presidentit, Gjonaj dhe vartësit e saj kanë ushtruar presion për të botuar në Fletoren Zyrtare vendimet e Këshillit të Emërimeve në Drejtësi, ndërkohë që sqaron se botimi në fjalë bëhet vetëm në Gjykatën e Lartë. "Në këtë tentativë për grusht shteti, bazuar në provat që u bënë publike dje, rezulton të jetë e përfshirë drejtpërdrejt Etilda Gjonaj dhe institucione në varësi të saj, duke përvetësuar një kompetencë që Kushtetuta ia jep Presidentit. Sipas Kushtetutës, vendimet e KED- it nuk botohen në Fletoren Zyrtare, por publikohen vetëm në faqen e internetit të Gjykatës së Lartë. Po mbushen 24 orë nga bërja publike e shkeljeve nga Ministria e Drejtësisë, që përmes falsifikimeve ka konsumuar disa vepra penale. Për këto arsye dhe prova të tjera që po sigurohen brenda ditës së hënë, do të depozitoj kallëzimin penal për Etilda Gjonajn në SPAK", tha Meta. Presidenti vijoi më tej duke lajmëruar se ministrja Gjonaj e dekretuar prej tij ka humbur tashmë besimin, ndaj i sugjeron që brenda ditës së hënë të japë dorëheqjen për të shmangur kështu precedentin që një President padit penalisht një ministër të shtetit të tij. "Duke qenë se Etilda Gjonaj e ka humbur tërësisht besimin e Presidentit të Republikës, të shprehur me dekret për emërimin e saj, do të mirëprisja dorëheqjen dhe përballjen e saj me drejtësinë. Si një ish- ministre do doja që ajo të hetohej e lirë", tha Meta.
VIJA E KUQE
Presidenti Meta tha në konferencën e djeshme se Gjykata Kushtetuese është vija e kuqe, për të cilën ai u shpreh se nuk do të bënte asnjë tolerim që të kapej. Gjithashtu, Meta tha se i ka paralajmëruar që prej tri vitesh të gjithë ata që do tentojnë shkelin Kushtetutën e Republikës së Shqipërisë, se më pas legjitimitetin do t'ia kalojë popullit. "Presidenti e ka të qartë rolin e tij për të mbrojtur dhe i ka lajmëruar të gjithë brenda dhe jashtë vendit. Gjykata Kushtetuese është vijë e kuqe dhe e kuqe flakë, siç është flamuri i Shqipërisë, për të cilin kanë dhënë jetën mijëra dëshmorë dhe patriotë. Nuk do të ketë Shqipëri pa shqiptarë", tha Meta.
GRUSHTI I SHTETIT
Në konferencën e djeshme, Presidenti Ilir Meta reagoi edhe ndaj deklaratave të kritikëve të tij, të cilët janë shprehur publikisht se Edi Rama është Kryeministër dhe s'ka se ndaj kujt të bëjë grusht shteti. Ai sqaroi se grusht shteti mund të jetë kur opozita tenton të marrë pushtetin me forcë, dhunë dhe armë, por edhe kur një pushtet kërkon të marrë në mënyrë antikushtetuese pushtetin e një institucioni tjetër legjitim. "Të mos e ngacmojnë Kushtetutën dhe Gjykatën Kushtetuese, sepse pastaj legjitimitetin e merr populli. Grushti i shtetit ka disa forma. Kur një opozitë përpiqet të marrë qeverinë me forcë e dhunë dhe mënyra të armatosura, por ka forma kur një pushtet kërkon të marrë në mënyrë antikushtetuese pushtetin e një institucioni tjetër legjitim dhe në këtë rast kemi, në mënyrë antikushtetuese, rrëmbimin e kompetencave të Presidentit për të pasur një gjykatë garante të Kushtetutës, të balancuar, të pavarur, që është edhe gjyqtarja e problemeve që ka shoqëria jonë, shteti ynë, institucionet tona", përfundoi Presidenti.
INFORMIMI I REPORTERES
Dje kreu i shtetit pati edhe një takim me reporteren për Shqipërinë në Parlamentin Europian, Isabel Santos. Pas takimit, Presidenti Meta bëri me dije se objekt diskutimi ka qenë edhe kapja sipas tij e Gjykatës Kushtetuese nga qeveria. "Lakmia e maxhorancës për të kapur me çdo mjet antikushtetues Gjykatën Kushtetuese cenon integritetin e këtij institucioni kyç për llogaridhënien qeverisëse dhe komprometon rëndë vullnetin e kësaj maxhorance për të çelur negociatat e anëtarësimit me Bashkimin Europian. Miratimi i ligjit antikushtetues ditën e mbërritjes në Tiranë të Komisionit të Venecias dëshmon mungesën e thellë të respektit ndaj këtij institucioni ndërkombëtar dhe fakton se qëllimi i vetëm i kësaj maxhorance është rikthimi i diktaturës përmes ' mjeteve ligjore'", shkroi Presidenti në "Facebook".