PD prezanton programin për shëndetësinë, Basha: Anulim i PPP, pagë 1200 euro mjekëve
Largimi i mjekëve dhe infermierëve, kryedemokrati: Pagën e mjekëve do ta bëjmë 1200 euro dhe të infermierëve 700 euro
Kryetari i Partisë Demokratike, Lulzim Basha, prezantoi dje programin e PD- së për të nxjerrë nga kriza sektorin e shëndetësisë.
Sipas kreut të PD- së, shkaktarët kryesorë që kanë çuar në pikën më të dobët shërbimin mjekësor në Shqipëri janë koncesionet. Ndaj, ai tha se prioriteti numër 1 i qeverisë së djathtë, kur të vijë në pushtet do të jetë anulimi i tyre. Në konferencën e organizuar në bashkëpunim me Fondacionin Konrad Adenauer, me temë “Sfida dhe vizione në shëndetësi”, Basha tha se shqiptarët paguajnë 3540 milionë euro në vit për koncesionet, ndërsa nga ana tjetër, buxheti i shtetit është ulur në nivelet që e çon Shqipërinë vendin që financon më pak për shëndetësinë. “Rritja e financimit dhe mirëmenaxhimi i fondeve do të nisë me anulimin e të ashtuquajturave koncesione. Akti i anulimit të tyre do të jetë ndër aktet e para të qeverisë sonë. Çlirimi i mbi 35 milionë eurove në vit, që sot, në emër të buxhetit për shëndetësinë përfundojnë në 3- 4 duar dhe bashkëndahen me pushtetarët e korruptuar, do të jetë mundësi e mirë për të nisur ekzekutimin e politikave tona”, tha Basha. Por ky do të jetë vetëm hapi i parë, sipas kreut të opozitës, për të rimëkëmbur shërbimin mjekësor. Në fjalën e tij, Basha risolli edhe një herë konceptin e spitalit si sipërmarrje, që do të mundësojë kujdesin shëndetësor parësor në shtëpi, një ide e mëparshme kjo e qeverisë së djathtë. “Koncepti i ‘ spitalitsipërmarrje’, kujdesi shëndetësor parësor në shtëpi, shëndeti përmes mjekut të familjesprofesionist i lirë, janë disa nga konceptet që duam të diskutojmë më korpusin e profesionistëve dhe administratorëve të shëndetit publik. Këto ndërhyrje, sipas nesh, janë esenciale për të rritur cilësinë e kujdesit shëndetësor dhe për të eliminuar korrupsionin dhe keqpërdorimin e tyre politik sot apo nesër”, vijoi Basha.
RRITJA E PAGËS Emigrimi i mjekëve dhe infermierëve është një nga shqetësimet kryesore të Shqipërisë vitet e fundit. Me qindra mjekë dhe infermierë kanë lënë Shqipërinë për të punuar në perëndim vetëm dy vitet e fundit. Sa i përket këtij shqetësimi, Basha tha se është i vetëdijshëm që nuk mund ta frenojë plotësisht, por përpjekja që do të bëjë PD- ja kur të vijë në pushtet, sipas tij, është që të rrisë pagat e mjekëve dhe infermierëve në nivelin e Kosovës. “Kjo mënyrë e re e funksionimit të spitaleve, ku do të krijohen të tjera marrëdhënie midis spitalit, mjekut dhe personelit shëndetësor, përveç kontratave me kohë të plotë, do të ketë edhe mjekun e familjes profesionist të lirë dhe do të bëjë të mundur që, të paktën në fazën e parë, ne të jemi në gjendje të zbatojmë angazhimin tim dhe të PD- së, që pagat e personelit shëndetësor të rriten në mënyrë të menjëhershme me 1200 euro për mjekët dhe 700 euro në muaj për infermierët, si një masë e domosdoshme për të nisur kontrollin e largimit masiv të personelit shëndetësor dhe pasojat që sjellë për pacientët”, vijoi Basha.
S’KA SHËNDETËSI
FALAS
Ndryshe nga kundërshtari i tij politik, Edi Rama, Lulzim Basha nuk premton shëndetësi falas. Sipas kreut të selisë blu, premtimi për shëndetësi falas është perde për të fshehur korrupsionin dhe vjedhjen. “Nuk ka shëndetësi falas. Shëndetësia falas është një parullë mashtruese për të zbukuruar apo mbuluar, në rastin më të mirë, financimin e plotë nga taksimi universal. Ky financim, si përqindje e prodhimit të brendshëm, ka ardhur në ulje dhe barra që i imponon sistemit shëndetësor, është bërë e papërballueshme, e ka thyer në mes shëndetësinë shqiptare”, tha Basha.