PD: Hije korrupsioni për koncesionin Thumanë- Kashar
Partia Demokratike ngre hije dyshimi në lidhje me garën e re për koncesionin e rrugës Thumanë- Kashar. Departamenti Antikorrupsion në selinë blu, përmes një deklarate për mediat shprehet se “Qeveria ka anuluar kontratën koncesionare me PPP për ndërtimin e segmentit Thumanë - Kashar – Lekaj. Koncesioni ishte korruptiv dhe Partia Demokratike dokumentoi se si ishte dyfishuar vlera reale e ndërtimit të rrugës dhe ishte zgjedhur drejtpërdrejt oligarku, mik i Kryeministrit. Anulimi i një koncesioni korruptiv është një lajm i mirë për qytetarët. Mirëpo, nuk mund të jetë lajm i mirë nëse anulimi nuk është bërë për të luftuar aktin e parë korruptiv, por për qëllime të tjera më madhore korruptive”, thuhet në deklaratë. Sipas tij, gara që pritet të hapet ka paracaktuar fituesin, i cili do të taksojë këtë aks rrugor për një periudhë 30- vjeçare. “Ministria e Infrastrukturës pritet që shumë shpejt të hapë ‘ garë’ për ndërtim me koncesion të tipit BOT për këtë aks rrugor, që nënkupton ndërtimin e rrugës nga kapitali privat dhe më pas kompania përfiton fondet nga taksimi i aksit për një periudhë së paku 30- vjeçare”, thuhet në njoftimin e PD- së. Selia blu hedh hije dyshimi për këtë garë dhe i drejton ministres së Infrastrukturës tri pyetje në lidhje me këtë koncesion, që po përgatitet të jepet. “Pyetjet që duhet të marrin përgjigje nga Ministria e Infrastrukturës janë: 1. A është paracaktuar si fituese e kësaj procedure fiktive kompania ‘ TERNA’ dhe a ka kontakte personale ministrja Belinda Balluku me këtë kompani? 2. A është urdhëruar Komisioni që të hartojë kriteret dhe dokumentat e tenderit, duke ia përshtatur ato klientit të paracaktuar dhe me të cilin ka arritur pazarin e radhës? 3. A janë duke u hartuar propozimi teknik dhe financiar, si dhe kriteret e tenderit, sipas kushteve që i plotëson vetëm një kompani, duke eliminuar në këtë mënyrë konkurencën e lirë, që është parakusht ligjor për çdo prokurim publik?”, thuhet në deklaratën e selisë blu.