Organizonin lojëra fati, arrestohen 115 persona, biznesmenë e punonjës
Në pranga Gramoz Murataj, administratori i pikës kryesore të basteve, si dhe vëllai i kryetares së KPA- së, Natasha Mulaj
Policia e Shtetit arrestoi 115 persona dhe procedoi në gjendje të lirë 24 të tjerë, pas një hetimi 7- mujor për ushtrimin dhe organizimin e lotarive dhe basteve sportive.
Pas operacionit të zhvilluar gjatë momenteve që luheshin ndeshjet e “Europa Leage” u sekuestruan dhe shuma të mëdha monetare, kompjuterë të lojërave të fatit, armë dhe celularë. Ndër personat që u arrestuan ishin administratorët dhe menaxherët e lokaleve ku zhvilloheshin lojërat e fatit: Gramoz Murataj, Ervin Frashëri, Isuf Tato, Igli Oboni, Elvis Mulaj, Denis Hysko dhe Erdian Myftari. Burime thanë se Murataj është një ndër personat kryesorë i implikuar në këtë aktivitet. Ndërkohë, në pranga sipas Policisë ka rënë edhe vëllai i kryetares së Kolegjit të Posaçëm të Apelimit, Natasha Mulaj, Elvis Mulaj. “Janë sekuestruar shuma të mëdha parash, kompjuterë të lojërave të fatit, armë zjarri, dhjetëra aparate celulare e aksesorë të tjerë, që shërbenin për organizimin dhe implementimin e aktivitetit kriminal. Ndër të arrestuarit janë edhe disa nga organizatorët kryesorë të kësaj veprimtarie të paligjshme, që sipas parashikimeve të Kodit Penal, dënohet nga 7 deri në 15 vjet burg”, njoftoi dje Policia.
HETIMET Hetimet për këtë dosje kanë nisur në vitin 2019 pas informacioneve të dhëna nga qytetarë në Policinë e Shtetit. Kjo e fundit ka referuar materialet në Prokurori, ku është regjistruar procedimi penal dhe është kryer hetim me metoda speciale, si përgjime dhe vëzhgime. Hetimet u shtrinë më pas në disa qytete të vendit dhe është dokumentuar sipas Policisë në 7 prej tyre. “Bazuar në informacionet e marra në rrugë operative dhe nga informacionet e adresuara nga qytetarët në adresat zyrtare të Policisë së Shtetit, për ushtrimin dhe organizmin e lotarive dhe basteve sportive pa leje, vënien në dispozicion të lokaleve për lojëra fati, fshehje të ardhurash dhe pastrim të produktit të veprës penale, Drejtoria Vendore e Policisë Tiranë regjistroi në Prokurorinë e Rrethit Gjyqësor Tiranë procedimin penal nr. 5431 të vitit 2019. Pas një pune procedurale dhe hetimore, duke aplikuar format dhe metodat speciale të hetimit, u arrit të dokumentohej aktiviteti kriminal në Tiranë, Durrës, Elbasan, Fier, Berat, Korçë, Lezhë e Shkodër”, shkruhet në njoftim.
ARRESTIMET Gjatë operacionit për arrestimin e personave të implikuar në këtë veprimtari morën pjesë 1540 forca policore dhe u krye njëkohësisht në 7 qytete. Prokuroria e Tiranës kishte marrë urdhërkontrolle në Gjykatë për shumë ambiente, ky dyshohej se ushtrohej aktiviteti kriminal. “Në këtë kuadër u organizua operacioni policor i koduar ‘ Fati i lojërave’, i cili u zhvillua në të njëjtën kohë në të 8 qarqet e sipërpërmendura, nën drejtimin e drejtorit të përgjithshëm të Policisë së Shtetit. Gjatë operacionit, i cili u zhvillua në kohën e zhvillimit të ndeshjeve të futbollit të Europa League, u përfshinë 1540 forca policore nga Departamenti i Policisë Kriminale, Departamenti për Sigurinë Publike, Drejtoritë Vendore të Policisë Tiranë, Durrës, Berat, Fier, Korçë, Elbasan, Lezhë, Shkodër dhe FNSH- të Tiranë, Fier e Shkodër. Në Tiranë dhe në qarqe u ushtruan 486 kontrolle në lokale dhe ambiente, ku dyshohej se zhvillohej kjo veprimtari kriminale”, shkruhet në njoftim.