GRUAJA E PRONARIT TË KOMPANISË SË MBETJEVE: NE, MBAJMË VETËM TË RICIKLUESHMET

Rozina Kormuzi, bashkëshortja e të arrestuarit Zamir Kormuzi, pronar i kompanisë së mbetjeve “Kormuzi” në Vlorë, tregoi dje se kompania e të shoqit merret vetëm me mbetjet e riciklueshme. “Ne jemi një familje që punojmë me djersën e ballit. Jemi të pastër. Nuk jemi kimistë për të parë se çfarë janë 5 qeset që kanë ardhur këtu në pikën tonë të grumbullimit. Në punojmë me mbetje të riciklueshme, por në asnjë mënyrë nuk jemi kimistë për të parë apo analizuar se çfarë përmbajnë qeset. Qeset i sjell vetë furgoni nga porti drejt pikës sonë, nëse janë të rrezikshme, të bllokohen që në port. Ne nuk i pranojmë mbetjet e rrezikshme. Në licencë kemi vetëm mbetje të riciklueshme. Vijnë pesë qese, ndërsa unë marr vetëm mbetjet e riciklueshme, të tjerat i hedh në kosh të mbeturinave. Këtu ekspozohet kjo gjë, për të mbuluar gjëra më të mëdha. Burri ka shkuar për të dhënë një deklaratë dhe pas 10 minutash e kanë arrestuar. Furgoni i firmës ‘ Delfini’ ka ardhur në orën 08: 30, ka shkarkuar 5 qese me mbetje të riciklueshme dhe në 17: 30 ardhur Policia që ka bërë foto të këtyre qeseve. Furgoni nuk ka ardhur më gjatë ditës. Në fotot që ka bërë Policia, ka gjetur rreth 1 kg lesh xhami, që e morën me vete, ky është një produkt që gjendet kudo. Nuk kemi pasur asnjë rast tjetër. Janë mbetje të riciklueshme. Asnjëherë në një vend ku punojnë njerëz nuk vijnë mbetje të rrezikshme. Në momentin që ne dyshojmë për çdo mbetje, njoftojmë institucionet përkatëse. Burri është ndaluar padrejtësisht. Kemi vite që punojmë pastër. Nga Gjykata pres vetëm drejtësi, pasi burri nuk është i implikuar në këtë ngjarje. Jemi një familje që punojmë pastër”, shprehet Kormuzi.