“Grabitja” e Shëngjinit, kërkohet 3 vjet burg për Fran Frrokajn
Prokuroria jep pretencën për 19 personat e akuzuar për pronat
Prokuroria e Lezhës ka dhëne pretencën për 19 persona të vënë nën akuzë për tjetërsimin e pronave te Rana e Hedhun në Shëngjin.
Në seancën gjyqësore të zhvilluar paraditen e djeshme, prokurori Erjon Shehaj ka kërkuar 43.6 vite burg në total për të pandehurit, mes të cilëve dhe ish- zyrtarë lokalë të Lezhës. Kështu, për ish- kryetarin e Bashkisë Lezhë, Fran Frrokaj, është kërkuar 3 vite burg dhe ishnënkryetarin Enver Hafizi 2 vite burg, si dhe heqjen e së drejtës për të ushtruar funksione publike për një periudhe 3- vjeçare. Ndërsa për ishkryetarin e qarkut, Gjok Ndoka, është kërkuar 4 vite burg dhe ish- drejtorin e Hipotekës, Artan Djala, 3 vite burg, si dhe heqjen e të drejtës për të ushtruar funksione publike për një periudhe 5 dhe 3- vjeçare. Për personat e tjerë të pandehur, specialistë të institucioneve dhe përfitues toke, është kërkuar dënim nga 2 deri në 4 vite burg për veprat penale “Falsifikim i dokumenteve” dhe “Shpërdorim detyre”. Gjithashtu, organi i Akuzës ka kërkuar asgjësimin e praktikave të sekuestruara në lidhje me pronën e tjetërsuar. Seanca e radhës gjyqësore është caktuar më 11 mars, ku do të paraqiten konkluzionet e palës mbrojtëse të të pandehurve.
AVOKATI
Hetimet në lidhje me tjetërsimin e pronave te Rana e Hedhun në Shëngjin nisën në vitin 2017, ku në Prokurori u denoncuan rastet dhe pak muaj më vonë, personat e përfshirë në këtë çështje u arrestuan. Por më pas Gjykata vendosi ndryshimin e masave të sigurisë, duke vendosur që të hetohen në gjendje të lirë. Sipas organit të Akuzës, në bashkëpunim me njëri- tjetrin, duke abuzuar me detyrën kanë falsifikuar, tjetërsuar dhe përvetësuar 234 548 m2 tokë shtetërore ranishte në zonën bregdetare Shëngjin, te vendi i quajtur Rana e Hedhun. Avokati i ish- kryebashkiakut të Lezhës, Adrian Leka, tha se pretenca për Fran Frrokajn u dha e pambështetur në prova. Ai u shpreh se do të kërkojnë pafajësi, pasi nuk provohet se ka kryer vepër penale për të cilën akuzohet. “Sot u dha pretenca nga organi i Akuzës, i pambështetur në prova dhe ligj, pasi gjatë hetimit gjyqësor ka dalë se çdo pretendim i organit të akuzës është mbi dyshime dhe nuk vërtetohet në asnjë provë përgjegjësia penale e të mbrojturit prej nesh, zotit Fran Frrokaj. Në këto kushte, ne do kërkojmë deklarimin e pafajshëm, pasi nuk provohet se ka kryer vepër penale për të cilën akuzohet”, tha Leka.
TJETERSIMI I PRONAVE
Tjetërsimi i 234 mijë metrave katrorë tokë në malin e Shëngjinit, Malin e Rencit dhe te Rana e Hedhun u zbulua pas kallëzimit që depozituan në Prokurorinë e Lezhës dy pronarët legjitimë të sipërfaqeve të “grabitura”. Dy pronarët që kanë denoncuar skandalin janë Gjek Çelaj dhe Pjetër Prela. Prokuroria e Lezhës, mbi bazën e kallëzimit penal të paraqitur nga shtetasi Gjek Çelaj më datë 15 shtator 2017, ka regjistruar edhe procedimin penal nr. 671, viti 2017, për veprat penale të “Falsifikimi i dokumenteve” dhe “Shpërdorim detyre”. Në bazë të kallëzimit të Gjek Çelajt, ndër të tjera ka denoncuar se familja e tij ka banuar prej kohësh në vendin e quajtur Mali i Rencit, Shëngjin. Gjyshi i tij, i ndjeri Gjon Preka, ka pasur në pronësi të tij para vitit 1945, në Malin e Rencit, një sipërfaqe toke prej 12 dynymë tokë buke, si dhe një sipërfaqe prej 150 dynymë livadhe dhe kullota, fakte këto të pasqyruara në dokumentin nr. 2293/ 1, datë 04.06.2014, të lëshuar nga Arkivi Qendror Shtetëror. Pas njohjes së pronës, trashëgimtarët e të ndjerit Gjon Prek Çelaj kanë ndjekur rrugën ligjore për kthimin fizik të saj, proces i cili nuk ka përfunduar akoma.