Përmbysje e çmendur, Tirana ngjitet në krye
Teqja të kuq, eurogol i Bathës dhe Torasës, bardheblutë shkojnë + 2
Olsi Teqja merr të kuq. Xhika i bën gati këmbën Bathës. Këtu nis një... çmenduri e Tiranës.
Në një ndeshje të nisur me rast goli që në minutën e dytë, bardheblutë përmbysin Kukësin, parakalojnë në renditje dhe ngjiten në krye. Një autogol i Vangjelit nuk e gjunjëzon Tiranën. Përkundrazi, u jep më shumë forcë kryeqytetasve që të mos pajtohen me padrejtësinë e fatit. Pasi Kukësi shpërdoron tentativa, një eurogol nga Idriz Batha barazon shifrat. Në vetëm 120 sekonda lojë, Kobina bën një veprim të jashtëzakonshëm. Driblon Obanor gjunjëzon Lulajn në mes të zonës së Kukësit, asiston Torasën që nuk fal me portën thuajse të boshatisur, duke përmbysur shifrat 1- 2 dhe Tirana merr kreun.
PJESA E PARË Muçi kërkon të surprizojë Kukësin në start. Në minutën e dytë, pas kombinimit me Çelhakën, gjuan një top që në momentet e fundit ulet tokazi. Xhika është i vendosur dhe ndalon sferën. Bardheblutë në ofensivë dhe në të pestën minutë Kobina futet brenda zonës, provon, por Xhika sërish i bën bllokadë. Hamiti fal Musollin e më pas Dokën, të cilët ndëshkohen disa minuta më vonë dhe loja vijon me ritëm, me grintë dhe shumë interesante. Të pranishëm janë thuajse 7000 tifozë dhe entuziazmi është i pranishëm në të dyja kahet. Batha provon me një goditje dënimi, por sfera që kalon murin gjen edhe një herë Xhikën. I pakalueshëm. Kukësi shënon me Shkurtajn, por më parë ishte ndalur loja për faull të sulmuesit ndaj Vangjelit. Kukësi e mbyll në ofensivë me dy tentativa. E para, e artë dhe flagrante me Rrocën, që gjuan në cep të shtyllës së Likës, por jashtë. Një minutë më vonë, Ethemi bën të parën gjuajtje në kuadrat për Kukësin, lehtë. Vetëm 0- 0.
PJESA E DYTË Nuk ka zëvendësime dhe ekipet futen njësoj. Tirana më kërkuese, ndërsa Kukësi më i qartë në veprimet e ofensivës. Në minutën e 52- të, Musta kalon në të majtë Dokën, hedh tokazi një top në qendër ku Shkurtaj s'e godet dot, por Vangjeli i pafat e devijon sferën pasi gjuri tjetër i zhytet në tokë dhe përfundon në cep të portës së Likës. Kukësi në avantazh dhe Tirana ndihet e tradhtuar nga fati. Në fushë Ngo për
Muçin dhe më pas Ismajlgeci për Hoxhallarin. Bardheblutë kanë dukshëm marsh më shumë, por Kukësi shpërdoron pas shpërthimeve të Abazajt disa herë. Gavazaj i zë vendin Ethemit të dëmtuar dhe Lulaj- Shkurtajt. Abazaj i jashtëzakonshëm në kundërsulme, por kuksianët nuk shënojnë golin e sigurisë. Një goditje dënimi në minutën e 84- t në hyrje të zonës, e shkaktuar nga Teqja, shoqërohet me daljen nga loja të këtij të fundit pas dy të verdhëve. Batha, pak minuta më parë kishte ndierë ngërç, por në ndihmë i ishte gjendur ish- shoku te Partizani, Xhika. Përballë këtij të fundit, mesfushori lëshon një silurë që përfundon në trekëndësh dhe Tirana barazon, 1- 1. Minuta revanshi. Bardheblutë shfrytëzojnë superioritetin numerik në fushë, por dy minuta më vonë, shtatë lojtarë të Kukësit kundrejt tre bardhebluve në zonë nuk ndalin dot galopimin e Kobinës. Është momenti i tij. Shpërthen nga e djathta, driblon Obanor, shkon drejt vijës fundore dhe me një veprim fantastik kalon edhe Limajn që e gjunjëzon, duke i dhënë hapësirën vetes të asistojë në qendër. Sfera te Torasa, që s'e ka të vështirë të shënojë për 1- 2. Ekstazë bardheblu. Përmbyset Kukësi dhe njëherazi edhe renditja. Tirana merr tri pikë përballë rivales direkte. 44 pikët pas 23 javëve i japin kreun, me dy më shumë sesa verilindorët dhe në derbi shkojnë me moralin e duhur.